“Şamaxı”nın baş məşqçisi Ayxan Abbasovun futbolinfo.az saytına müsahibəsi
– Mövsümə səfərdə “Sabah”la heç-heçə (2:2) etməklə başladınız və turun sensasiyasına imza atdınız. Sizcə, nəyin hesabına geridönüş edə və xal qazana bildiniz?
– Bizim üçün çox çətin idi. “Sabah” avrokuboklarda çıxışını davam etdirən komandadır. Bilirdik ki, rəqib üçün də bu görüş ağır keçəcək. Çünki avrokubok matçından 3 gün sonra çempionat oyununa çıxmaq asan deyil. Bundan istifadə etmək istəyirdik. Komandamız əzmkarlıq göstərdi. Sevindirici hal o oldu ki, 0:2-dən sonra hesabı bərabərləşdirməyi bacardıq. Oyunun sonunda isə həm biz 3-cü qolu vura bilərdik, həm də rəqib. Əsas odur, ağır səfər görüşündən vacib 1 xalla ayrıldıq. Dediyim kimi, bu nəticəyə əzmkarlığın hesabına nail olduq.
– “Şamaxı”da yeni komanda formalaşdırırsınız. Futbolçuların bir-birini gözüyumulu başa düşməsi üçün nə qədər vaxt lazımdır?
– Bəli, yeni komandayıq. Bizim üçün ilk 4-5 tur çox çətin keçəcək. Futbolçuların Azərbaycan çempionatına adaptasiyası, üstəlik, meydanda bir-birlərini başa düşməsi üçün vaxt tələb olunur. Amma uyğunlaşma prosesi dövründə də əzmkarlıq göstərmək və bacardığımız qədər xallar qazanmaq lazımdır.
– “Transfer pəncərəsi”nin sonunadək hansı mövqelərə yeni futbolçunun gətirilməsini istəyirsiniz?
– Transferləri davam etdirmək istəyirik. Ən çox hücum xəttinə oyunçu axtarırıq. Çünki bu mövqedə də rəqabətin olmasına çalışıram. Axtarışlar davam edir. Komandada rəqabət yaratmaq vacibdir.
– Növbəti turda “Araz Naxçıvan”la qarşılaşacaqsınız. Bu oyundan hansı nəticəni gözləyirsiniz?
– Səfərdə oynayacağıq. “Araz-Naxçıvan” yaxşı komandadır. Bu yay ən çox transfer edən klublardan biridir. Rəqibin hücum xətti çox güclüdür. “Araz-Naxçıvan”ın ön xətdə oynayan futbolçuları Azərbaycan çempionatını yaxşı tanıyırlar. Bizi çətin görüş gözləyir. Hər oyuna necə hazırlaşırıqsa, bu matça da o qaydada hazırlaşırıq. Meydandan xalla ayrılmağa çalışacağıq.
– “Şamaxı”nın qarşısına Premyer Liqada möhkəmlənmək tapşırığı qoyulub. Bəs, hazırkı heyətlə daha artığına iddia etmək olarmı?
– Bizim üçün öncə Premyer Liqada möhkəmlənmək vacibdir. Amma nə qədər irəli getmək mümkündürsə, ona can atacağıq. Futbolçularıma inanıram, yaxşı nəticə verə bilərik.
CAVAD