“Təbii ki, turun ilk matçında qalib gəlmək istəyərdik. Bunun üçün çox çalışdıq. Təəssüf ki, rəqib əlinə düşən qol imkanlarından yaxşı istifadə edərək qələbə qazandı”. Bu sözləri futbolinfo.az-a açıqlamasında “Səbail”in futbolçusu Rüfət Abdullazadə deyib.
23 yaşlı yarımmüdafiəçi komandasının Misli Premyer Liqasının ilk turunda “Zirə”yə 1:4 hesablı məğlubiyyətindən danışıb: “Yeni komandayıq. Heyətimizdə çoxlu dəyişiklik var. Uyğunlaşma üçün müəyyən vaxt lazımdır. Bu heyətlə ilk dəfə birlikdə çıxış edirdik. Bu amillərin də məğlubiyyətdə rolu var. Amma artıq bu oyunu geridə qoyub qarşıdakı matça hazırlaşırıq. Növbəti oyunda əlimizdən gələni edib yaxşı nəticə qazanmaq istəyirik”.
O, qarşıdakı turda “Neftçi”yə qarşı keçirəcəkləri matçdan da söz açıb: “Hər oyunda olduğu kimi bu oyuna da qələbə üçün çıxacağıq. Yaxşı kollektivimiz var. Rəqibin gücünə bələdik. Amma onlar da yenilənmiş heyətlə mübarizə aparır. Yaxşı nəticə qazanmağa çalışcağıq. Ümid edirəm ki, bu, bizdə alınacaq. Oyuna hazırlaşırıq”.