Dünya reytinqinin 11 nömrəsi yunan tennisçi Stefanos Tsitsipas atası Apostolosun bundan sonra onunla məşqçi kimi işləməyəcəyini açıqlayıb.
“Atamla məşqçilik əməkdaşlığımın sona çatdığını ürək ağrısı ilə elan edirəm. Son bir neçə il ərzində o məni məşq etdirməyə, doğru yolda yetişdirməyə, həm meydanda, həm də meydandan kənarda bilik və hikmət verməyə çalışıb. Bunun üçün ona minnətdaram. Uğur qazanmaq üçün çəkdiyi fədakarlıqlara, ağrılara və əziyyətlərə görə ona təşəkkür edirəm. Bundan sonra onun rolu ata çərçivəsində qalacaq.
O mənimlə səyahət etməyə davam edəcək və həmişə istədiyim kimi, məni dəstəkləmək və meydandan kənarda mənə kömək etmək üçün orada olacaq. Mən ona uzun illər məşqçi kimi etibar etmişəm və əməkdaşlığımızı uğurlu hesab edirəm. Onun yerini kimin tutacağına əmin deyiləm və hələ ki, qərar verə bilmirəm. Bildiyim odur ki, bu fəsli və bu mərhələni bağlamağın və yenisini yazmağa başlamağın vaxtıdır.
Səhvlərimi qəbul etmək bir idmançı kimi işimin bir hissəsidir və bundan sonra da öz üzərimdə çox çalışacağam”, – deyə Stefanos sosial şəbəkə səhifəsində yazıb.