Bu gün Milli Hokkey Liqasının yeni mövsümünə start verilir. Bakı vaxtı ilə saat 21:00-da “Buffalo” və “Nyu-Cersi” komandaları Çexiyanın Praqa şəhərində NHL Qlobal Seriyası çərçivəsində iki oyunun birincisini keçirəcək.
Bu komandalar müntəzəm mövsümdə Avropada oynayacaq yeganə komanda olmayacaq. Noyabrın 1 və 2-də “Dallas” və son çempion “Florida” Finlandiyanın Tampere şəhərində görüşəcəklər. Oktyabrın 4 və 5-də yalnız “Buffalo Sabers” və “Nyu Cersi Devils”in oyunu var. Digər komandalar çempionata oktyabrın 8-dən sonra Şimali Amerikada başlayacaq.
Çempionatın son görüşləri aprelin 18-də baş tutacaq. Stenli Kuboku müntəzəm çempionat bitdikdən az sonra başlayaraq iyunda yekunlaşacaq.
2021-ci ildən başlayaraq NHL 32 komandadan ibarətdir. Liqaya qoşulan son klub “Sietl” olub. Bununla belə, yeni mövsümdə iştirakçıların tərkibi əvvəlkindən fərqlənir: Arizona ştatının yerini Yuta tutub.
Son vaxtlar liqanın mümkün genişləndirilməsi ilə bağlı söhbətlər bir az da aktivləşib. NHL komissioneri Qari Betmen açıq söyləməsə də, hər şey buna doğru gedir.
Əvvəlki müntəzəm mövsümlə müqayisədə 10 klubda yeni baş məşqçi olacaq. Maaş həddi son 12 ildə ən böyük məbləğə çatıb. Keçən mövsüm komandalar oyunçulara cəmi 83,5 milyon dollar xərcləyə bildiyi halda, bu mövsüm onlar 88 milyon dollar xərcləmək hüququna malikdir. Yeri gəlmişkən, növbəti mövsümdə daha 4,5 milyon dollar artım gözlənilir. Şimali Amerika mediasına görə, NHL Rəhbərlər Şurasının son iclasında 92,5 milyon dollar məbləği müzakirə edilib.
Tarixdə 16-cı dəfə Qış Klassikası adi mövsümün daxilində baş tutacaq. Yanvarın 1-nə keçən gecə “Çikaqo Blek Houks” “Wrigley Field” beysbol stadionunda Sent-Luis komandasını qəbul edəcək. Bu, Çikaqo klubu üçün rekord sayda – beşinci iştirak olacaq.