“Qarabağ”ın futbolçusu Marko Yankoviç Avropa Liqasında Niderlandın “Ayaks” komandasına qarşı keçirəcəkləri oyundan əvvəl mətbuat konfransında iştirak edib.
Futbolinfo.az xəbər verir ki, monteneqrolu futbolçu sabah böyük və məşhur kluba qarşı oynayacaqlarını bildirib:
“Motivasiyamız yüksəkdir. Hər birimiz yaxşı nəticə əldə etmək niyyətindəyik. Bizim üstünlüyümüz ondadır ki, böyük komandalara qarşı oynamışıq. Keçmişdə oynadığımız matçlar onu göstərir ki, istənilən komandaya qarşı oynaya bilərik. Nəticədən asılı olmayaraq, əsas odur ki, biz yaxşı oyun nümayiş etdirə bilək”.
Avropa Liqasının Liqa mərhələsinin 3-cü turuna təsadüf edən “Qarabağ” – “Ayaks” matçı oktyabrın 24-də, Bakı vaxtı ilə saat 20:45-də başlayacaq.