“Qarabağ” UEFA Avropa Liqasının 3-cü turu çərçivəsində bu gün “Ayaks”ı qəbul edəcək.
Futbolinfo.az saytının məlumatına görə, bu, Ağdam klubunun Niderland təmsilçilərinə qarşı üçüncü sınağı olacaq.
Çempionumuzun yolu daha əvvəl iki dəfə Niderland komandası ilə kəsişib. Hər iki halda rəqib “Tvente” olub. 2009-10 mövsümünün pley-off mərhələsinə təsadüf edən ilk matçlar zamanı Enşededə “Tvente” 3:1 hesablı qələbə qazanıb, Bakıda qolsuz bərabərlik olub.
2014-15 mövsümündə eyni turnirin eyni mərhələsində komandalar yenidən üz-üzə gəliblər. “Qarabağ” bu dəfə revanşı almağı bacarıb. Bakıda 0:0, Enşededə 1:1 hesabı qeydə alınıb. Təmsilçimiz səfər qolu sayəsində qrup mərhələsinə adlayıb.
Niderlandlılarla 4 oyunun 3-də heç-heçə edib, 1 dəfə məğlub olan “Qarabağ” ilk qələbəsini bu gün qazanmağa çalışacaq.
Qeyd edək ki, Tofiq Bəhramov adına Respublika stadionunda keçiriləcək “Qarabağ” – “Ayaks” matçı saat 20:45-də başlayacaq.