II Liqada çıxış edən “Şahdağ Qusar” klubunun hücumçusu Tural Qürbətovun futbolinfo.az saytına müsahibəsi
– İkinci Liqanın 8-ci turu Şimal derbisi ilə yadda qaldı. Qubada yerli komanda üzərində 3:1 hesablı qələbə qazandınız. Oyunla bağlı fikirləriniz necədir?
– Bilirdik ki, azarkeşlərimiz neçə vaxtdır bu oyunu səbirsizliklə gözləyir. Komanda olaraq azarkeşlərimizin önündə gözəl oyun göstərmək, qələbə qazanaraq onları sevindirmək istəyirdik. Çox şükür, buna nail olduq.
– “Şahdağ Qusar” cari mövsümə əla başlayıb. 8 oyuna 8 qələbə qazanmısınız və xal itkisi ilə üzləşməyərək, birinci yerdə qərarlaşmısınız. Bu sezon belə inamlı çıxış etməyiniz nə ilə bağlıdır?
– Bəli, bu il komandamız yenilənib. Yeni baş məşqçi, yeni oyunçular gücümüzə güc qatıb. Bu da bizi uğurlara aparır.
– “Şahdağ Qusar”ın əsas “qol silahlarından” biri sizsiniz və son turda da baxımlı qola imza atdınız. Cari mövsümdə neçə qol vurmağı hədəfləmisiniz?
– Çox şükür, bu il də mənim üçün uğurlu keçir, komandama kömək ola bilirəm. Bu, mənim üçün sevindirici haldır. Qol sayı ilə bağlı konkret hədəfim yoxdur. Amma komandamın qələbə qazanması üçün əlimdən gələni artıqlaması ilə etməyə çalışıram.
– Ölkə Kubokunun II təsnifat mərhələsində “Araz-Naxçıvan”la üz-üzə gələcəksiniz. Bu görüşdə sensasiya etməyə gücünüz çatacaq?
– Bu, futboldur, hər şey ola bilər. Bizim üçün kubok əsas deyil, çempionata köklənmişik. Amma dediyim kimi, hər şey ola bilər. Çünki biz yaxşı komandayıq.
– İkinci Liqanın növbəti turunda isə “Göygöl” ilə qarşılaşacaqsınız. Çempionatdakı qələbə seriyasını bu görüşdə də davam etdirə biləcəksiniz?
– Düşünmürəm ki, bu oyun bizim üçün asan keçəcək. Çünki “Göygöl” yaxşı komandadır. İnşallah, qələbə qazanarıq və qalibiyyət seriyamızı davam etdirərik.
– “Şahdağ Qusar”ın qarşısına Birinci Liqaya yüksəlmək tapşırığı qoyulub. Keçən sezon bu missiyanın öhdəsindən gələ bilmədiniz. Bu dəfə alınacaqmı?
– Əvvəlcə klub rəhbərliyinə təşəkkür edirəm. Sağ olsunlar, bizə inanırlar, komanda üçün hər cür şərait yaradırlar. Mehriban kollektivimiz var. Bir sözlə, hər şey yüksək səviyyədədir və biz də bunun qarşılığını qələbələrlə verməyə çalışırıq. Hədəfimizə çatıb İkinci Liqada çempion olmaq istəyirik. Düşünürəm ki, buna layiq komandayıq.
CAVAD