Mingəçevir şəhərində “Etibar” idman klubunun açılış mərasimi keçirilib. Tədbirdə Mərkəzi Aran Regional Gənclər və İdman idarəsinin rəisi Azad Gözəlov, şəhid ailələri, qazilər və idman ictimaiyyətinin nümayəndələri iştirak edib.
Qeyd edilib ki, Mingəçevirdə belə idman klublarının yaradılması gənc nəslin sağlam ruhda böyüməsinə və idmanın inkişafına təkan verəcək. Yeniyetmə və gənclərə sağlam həyat tərzinin təbliğ olunması və onların asudə vaxtlarını səmərəli keçirməklə pis vərdişlərdən uzaq olması üçün klubun gələcəkdə fəaliyyət dairəsinin genişləndirilməsi nəzərdə tutulub.
Rəsmi hissə başa çatdıqdan sonra rayon rəsmiləri şəhid ailələri və qazilərlə birlikdə idman klubunda yaradılan şəraitlə tanış olublar. Klub müasir avadanlıqlarla təchiz olunub və burada gənclərin idmanla məşğul olması üçün hər cür şərait yaradılıb. İkimərtəbəli idman zalında boks zalı, 2 ədəd soyunub-geyinmə otağı, 2 ədəd duş kabinəsi, texniki otaq, məşqçi otağı, müdiriyyət otağı, həkim otağı və sanitar qovşaqlar var. Klubun məşqçisi Sadiq Hacıyev əsas məqsədlərinin bu zalda dünya və Avropa çempionları yetişdirmək olduğunu bildirib.
BƏHRUZ MUSAYEV
