Lion “Olimpik”i UEFA Avropa Liqasında “Qarabağ”a qarşı Bakıda keçirəcəyi oyuna görə Liqa 1-dəki matçının təxirə salınmasını istəyir (RMC Sport). Klub “Nitsa” ilə görüşün ertələnməsinin tərəfdarıdır.
Fransa klubunun rəsmiləri 7 saatlıq uçuşla 4600 km yol qət edəcəklərini əsas gətirərək, çempionatdakı oyunun başqa tarixdə baş tutmasını tələb ediblər. Fransa Peşəkar Futbol Liqasının (LFP) isə hələlik bunu rədd etdiyi bildirilir.
Qeyd edək ki, UEFA Avropa Liqasının Liqa mərhələsinin V turuna təsadüf edəcək “Qarabağ” – “Olimpik” qarşılaşması noyabrın 28-də təşkil olunacaq. Liqa 1-in XIII turunun “Olimpik” – “Nitsa” matçı isə dekabrın 1-də, Bakı vaxtı ilə saat 20:00-da başlamalıdır.