Almaniya nəşri “Auto Motor und Sport”un məlumatına görə, “Sauber” gələn mövsüm Niko Hülkenberqin komanda yoldaşı olacaq sürücü ilə bağlı qərar verib. Komanda vaxtilə Azərbaycan qran-prisinin qalibi olmuş Valtteri Bottasla müqaviləni yeniləməmək qərarına gəlib.
Qabriel Bortoleto gələn mövsüm finlandiyalını əvəz edəcək. Onun müqaviləsinin artıq imzalandığı və yaxın vaxtlarda rəsmi açıqlamanın veriləcəyi bildirilir.
Qabriel Borotoleto Formula 2-də hazırda mövsümün bitməsinə iki tur qalmış turnir cədvəlinə başçılıq edir. Braziliyalı sürücü “McLaren”in gənclər proqramının bir hissəsidir. Lakin komanda Lando Norris və Oskar Piastri ilə uzunmüddətli müqavilələr bağladığından Bortoletonun transferinə mane olmayacağını bildirib.