“Kəpəz”in futboçusu Camal Cəfərovun futbolinfo.az saytına müsahibəsi
– Misli Premyer Liqasının 12-ci turunda “Səbail” üzərində 1:0 hesablı qələbə qazandınız. Matçla bağlı düşüncələrin necədir?
– Bu oyunda son saniyəyə qədər oynadıq, dayanmadıq, məşqçinin göstərişlərinə əməl etdik. Bizə qələbə çox lazım idi və nəticədə matçın son saniyələrində qol vurduq. Düşünürəm ki, qələbəyə layiq idik.
– Mövsümdə ikinci qalibiyyəti əldə etdiniz. Davamını gətirə biləcəksiz?
– Düşünürəm ki, ikinci qələbə komandanı daha da gözəl futbol nümayiş etdirməyə və yalnız qələbə üçün oynamağa sövq edəcək.
– Udduğunuz hər iki oyunda rəqib baş məşqçilər istefaya gedib…
– Rəqib komandaların baş məşqçilərinin istefası haqda heç nə deyə bilmərəm. Məncə, bu, onların düşünülmüş qərarlarıdır. Bu məsələ barədə şərh vermək mənə düşməz.
– “Kəpəz” liqada yerini qoruya biləcək?
– Ümid edirik ki, klub liqada qalacaq və bunun üçün biz futbolçular məşqçilər korpusu ilə birlikdə əlimizdən gələni edəcəyik. Ümumi baxsaq, komandamız heç də pis oynamır. Hücumlar etməyə, qol vurmağa, xallar qazanmağa çalışırıq.
– Qarşıda sənin müqavilə ilə məxsus olduğun “Sabah”la matç var. Qələbə qazana biləcəksiz?
– “Sabah”la oyuna proqnoz vermək istəmirəm. Komanda turnir cədvəlindəki mövqeyindən asılı olmayaraq, özünü bütün rəqiblərə qarşı eyni hazırlayır. Biz öz oyunumuzu göstərəcəyik, məşqçinin göstərişlərinə əməl edəcəyik. Təbii ki, qələbəyə ümid edirik, amma nəticənin necə olacağını matçın sonunda öyrənəcəyik.
CAVAD