Bu gecə Milli Basketbol Assosiasiyası müntəzəm çempionatında 12 qarşılaşma keçirilib. Nikola Yokiç və Domantas Sabonis tripl-dabl etməklə gecəyə damğa vurublar.
Diqqətçəkən məqamlardan biri son çempionunun növbəti məğlubiyyətidir. “Seltiks” doğma arenada “Qolden Steyt Vorriors”a məğlub olub – 112:118. Boston komandasında Teytum 32, qonaqlarda isə Kərri 28 xal toplayıb.
Alperen Şengünün komandası uğurlu çıxışını davam etdirir. Hyustonlular evdə “San Antoni Spörs”ə qalib gəliblər – 127:100. Alperen oyunda növbəti dabl-dablını edib (16+10).
Lebron Ceymsin 39 xalı da komandasına yardım etməyib. “Leykers” Memfisdə məğlubiyyətlə üzləşib – 131:114. Qeyd edək ki, bu oyun əfsanə üçün karyerasında 1500-cü MBA qarşılaşması olub.
Ən gərgin oyun Denverdə baş tutub. “Naggets”lə “Oklahoma Siti Tander” qarşılaşması meydan sahiblərinin 124:122 hesablı qələbəsi ilə yekunlaşıb.