“Şamaxı” klubunun portuqaliyalı qapıçısı Rikardo Fernandesin futbolinfo.az saytına müsahibəsi
– Söhbətə Misli Premyer Liqasının 12-ci turunda “Zirə” ilə keçirdiyiniz oyundan (0:2) başlayaq. Məğlubiyyətin səbəbini nədə görürsünüz?
– “Zirə” Azərbaycan Premyer Liqasının yaxşı komandalarından biridir. Əslində, meydana çox istəkli çıxmışdıq və ilk 20 dəqiqədə rəqibə yüksək təzyiq göstərdik. “Zirə”nin cərimə meydançasına daxil olsaq da, orada doğru qərarlar verə bilmirdik. Üstün oynadığımız dəqiqələrdə qol buraxdıq və bu, bizi bir qədər ruhdan saldı. Düşünmürəm ki, bu məğlubiyyətə bağlanıb qalacağıq. Artıq “Zirə” ilə görüşü unutmuşuq və məşqlərdə var gücümüzlə iştirak edirik.
– “Şamaxı” çempionatda keçirdiyi 11 oyundan sonra 12 xal toplayıb və turnir cədvəlinin 7-ci pilləsində qərarlaşıb. Bu nəticə sizin üçün qənaətbəxşdir? Yoxsa düşünürsünüz ki, daha çox xal toplaya bilərdiniz?
– Bəli, 12 xalımız var. Amma üzərimizdə çalışırıq və daha çox xal toplamaq istəyirik. Mövsümə yaxşı başladıq. Düzdür, son oyunlar bizim üçün o qədər də yaxşı keçmir. Ancaq klubda çalışan hər kəs öz işi ilə göstərir ki, biz daha artığına can atırıq. Əminəm ki, turnir cədvəlindəki vəziyyətimizi tez bir zamanda yaxşılaşdıracağıq.
– Növbəti turda sizi “Neftçi” ilə matç gözləyir. Bu görüşdən xal və ya xallarla ayrılmaq şansınız nə qədərdir?
– “Neftçi” ilə bizi maraqlı və çətin sınaq gözləyir. Bu turdan sonra çempionatda fasilə yaranacaq. Deməli, fasiləyədək vəziyyətimizi yaxşılaşdırmaq üçün bu oyundan sərfəli nəticə ilə ayrılmalıyıq. Bundan sonra fasilə müddətində məşqlərdə var gücümüzlə çalışmalı və dövrələrarası fasiləyədək çoxlu xallar toplamalıyıq.
– Komandanızın baş məşqçisi Ayxan Abbasov haqda fikriniz necədir? Onunla birgə çalışmaq sizin üçün rahatdır?
– Ayxan Abbasov əla məşqçi, əsl peşəkardır. Lazımi anda sərt olmağı bacarır. Bir sözlə, liderdir. Abbasov oyunçuların bütün bacarığını üzə çıxarmağı bacarır. Biz onun rəhbərliyi altında güclüyük. Həm baş məşqçinin, həm də onun köməkçilərinin kifayət qədər səriştəsi var.
– Çempionatımızla bağlı təəssüratınız necədir? Azərbaycan çempionatının səviyyəsi sizi qane edirmi?
– Gözlənilməz nəticələrin qeydə alındığı rəqabətli liqadır. Buna görə də oyunun hər anında diqqətli olmalı, konsentrasiyadan düşməməliyik.
– Ölkəmizə, Azərbaycan çempionatına tam uyğunlaşa bilmisiniz?
– Bəli, uyğunlaşmışam. Adaptasiya prosesi zamanı heç bir çətinlik çəkmədim. Futbol bütün dünyada eynidir.
– Azərbaycan Premyer Liqasında çıxış edən hansı qapıçıları bəyənirsiniz?
– Liqada yüksək səviyyəli qolkiperlər çoxdur. Konkret birini seçə bilmərəm. Ayrı-ayrılıqda hər biri unikal xüsusiyyətlərə malikdir.
AĞA