AFFA milli komandanın üzvləri üçün mükafat təyin edib. Amma məbləğ əvvəlki dövrlərdə olduğu qədər fantastik deyil.
Futbolinfo.az-ın yığma oyunçularından əldə etdiyi məlumata görə, Estoniya üzərində qələbə qazanılacağı halda heyətin hər bir üzvü 5-10 min manat aralığında “irəli düşəcək”. Qəbələdəki matçdan sonra İsveçlə oyun üçün də ayrıca mükafat müəyyənləşdiriləcək.
Qeyd edək ki, Azərbaycan milli komandası UEFA Millətlər Liqasının qrup mərhələsi çərçivəsində noyabrın 16-da Qəbələdə Estoniya yığması ilə qarşılaşacaq. Yığmamızı noyabrın 19-da da Solnada İsveç seçməsi ilə qarşılaşma gözləyir.
Estonlarla görüş millimiz üçün böyük əhəmiyyət daşıyır. Belə ki, cari mövsümdə bütün oyunlarından xalsız ayrılmış komandamız Estoniyaya qalib gələ bilməsə, qrup sonuncusu olacaq. Bu üzdən də yığmamız qrup sonuncusu olmamaq və C Liqasını tərk etməmək üçün estonları mütləq məğlub etməli, daha sonra İsveçdən xal almağa çalışmalıdır.