“Real” yeni mövsüm üçün ciddi planlar qurub. Madridlilər müdafiə xəttini xeyli gücləndirəcək.
Futbolinfo.az xəbər verir ki, Dani Karvahal və Eder Militaonun zədələnməsindən sonra arxa xəttdə problemlər yaşayan Kral Klubu qışda böyük transferlər etməyəcək. Klub rəhbərliyi əsas dəyişiklikləri yaya saxlayıb.
Militao bu saatlarda əməliyyat olunur. Onun yeni mövsümə kimi hazır olacağı gözlənilir. Brazilyalı məşqlərə qayıdanda əsas heyət üçün Conatan Ta ilə rəqabət aparmalı olacaq. Çünki madridlilər “Bayer”in üzvü ilə prinsipial razılığa gəlib.
“Real” müdafiənin cinahlarını da yaddan çıxartmayıb. “Bayern”dən Alfonso Devisin azad agent kimi gələcəyi dəqiqdir. “Jirona”dan Migel Qutyerresin də komandaya qayıdışı gözlənilir. Üstəlik, “Liverpul”dan Trent Aleksandr-Arnold madridlilərlə ilkin anlaşma əldə edib.
Bu transferlərdən sonra Ferlan Mendi və Fran Qarsiyanın İspaniyanın paytaxtından ayrılmaq ehtimalı böyükdür.