39 yaşlı britaniyalı sürücü, yeddiqat dünya çempionu Lyuis Həmilton pərəstişkarlarına müraciət edərək Əbu-Dabi Qran Prisində xüsusi aksiya hazırlanacağını elan edib.
“Lyuisin komandası, siz həmişə mənimlə olmusunuz. Bütün eniş-yoxuşlarda, hər addımda. Əbu-Dabidə bir səhifənin sonunu və digər fəslin başlanğıcını qeyd edəcəyik. Buna görə də mövsümün son yarışında avtomobilimdə mümkün qədər çox adın olmasından daha yaxşı bir şey düşünə bilmirəm”, – deyə Həmilton X sosial şəbəkəsində yazıb.
“Mercedes” komandasının rəsmi saytında öz fikirlərini yazan 150 azarkeşin adı yeddiqat dünya çempionunun Əbu-Dabidə çıxış edəcəyi bolidinin üzərində yazılacaq.
Xatırladaq ki, bu qran-pri onun üçün Almaniya komandasının heyətində sonuncu olacaq. Gələnildən etibarən Formula 1 üzrə yeddiqat dünya çempionu “Ferrari”də çıxış edəcək.