“Turan Tovuz”un kapitanı Şəhriyar Əliyevin futbolinfo.az saytına müsahibəsi
– Misli Premyer Liqasının 14-cü turunda “Sabah”la heç-heçə (1:1) etdiniz. Nəticədən razı qaldınız? Sizcə, bu görüşdə qələbə qazanmağınıza nə mane oldu?
– Həqiqətən, ağır oyun keçdi. “Sabah” turnir cədvəlindəki mövqeyinə baxmayaraq, çox yaxşı komandadır. Həm müdafiədə, həm də hücumda inamlı oynayırlar. Bu mənada, onlarla heç-heçə pis nəticə deyil. Düzdür, qələbə qazana da bilərdik. Əsas odur ki, xallarımızın üstünə xal gəldi. Bu xal sayəsində 4-cü yerdəki rəqibimizdən bir qədər də aralandıq.
– Rusiya mətbuatında baş məşqçi Kurban Berdıyevın komandadan ayrılmaq istədiyi haqda xəbərlər yayılmışdı, ancaq “Turan Tovuz” rəhbərliyi tərəfindən məlumat təkzib olundu. Ümumiyyətlə, belə xəbərlər sizə necə təsir edir?
– Açığı, o məlumat qarşıma çıxmayıb, harada yazıldığını bilmirəm. Biz belə şeylərdən uzaq olmağa, mətbuatda yazılanlara fikir verməməyə çalışırıq. Qarşımıza məqsəd qoymuşuq və hədəfimizə çatmaq üçün sonadək mübarizə aparacağıq. Mətbuatda çox şey yazıla bilər. Bizim işimiz onlara fikir vermək deyil, yaxşı nəticələrlə azarkeşlərimizi sevindirməkdir.
– Növbəti turda “Araz-Naxçıvan”ın qonağı olacaqsınız. Bu görüşdə hansı nəticəyə ümid edirsiniz?
– Bizi səfərdə ağır oyun gözləyir. Rəqibin gücü hər kəsə bəllidir. Cari mövsümdə çox yaxşı çıxış edirlər. İlk turdan sonra məğlubiyyət üzü görməyiblər. Buna baxmayaraq, evə sərfəli nəticə ilə dönməyə çalışacağıq.
– Son 3 turda heç-heçələri sıralayırsınız. Bununla bağlı nə deyə bilərsiniz?
– Düzdür, heç-heçələr qeydə alınıb. Ancaq “Qarabağ” və “Sabah” iddialı komandalardır. Çox təhlükəli oyunlar idi, uduza da bilərdik. Bu mənada, 1 xalı da özümüz üçün qazanc hesab edirəm.
– “Turan Tovuz” hazırkı heyətlə avrokuboklara vəsiqə qazanmaq gücündədir, yoxsa qışda heyətin bir qədər də gücləndirilməsini istərdiniz?
– Heyətdə yaxşı futbolçunun çox olması komandanın daha tez inkişaf etməsinə şərait yaradır. Bu haqda klub rəhbərliyi və məşqçilərimiz fikirləşirlər, “Turan Tovuz”u daha da gücləndirmək istəyirlər. Hazırkı heyətin üzvləri də komandanın avrokuboklara vəsiqə qazanması üçün sonadək mübarizə aparır. Hər bir futbolçu istər ki, komandada nəticəyə təsir edən, oyunun taleyini dəyişə bilən futbolçu sayı çox olsun. Komandamız güclənsə, daha da yaxşı olar.
FƏRİD