Kişi tennisində komanda halında reytinq cədvəli açıqlanıb. Bu reytinqə İtaliya millisi başçılıq edir.
Son Devis Kubokunun qalibi olan italyanların 637,25 reytinq xalı var. Builki titul uğrunda görüşdə onlar Niderland tennisçilərini üstələdilər. ATP reytinqinin lideri Yannik Sinner və Matteo Berrettininin fərdi oyunlarda qələbələri titulun ardıcıl ikinci dəfə qazanılmasına yetərli oldu.
Reytinqdə ikinci yeri bu mövsüm yarımfinal mərhələsinə yüksələn Avstraliya komandası tutur (519,75). Üçüncü yerdə 2022-ci ildə Devis Kubokunun qalibləri Kanada millisidir (477,5). Builki finalçı Niderland komandası reytinqdə iki pillə irəliləyərək dördüncü yerə yüksəlib (462).