“Olimpik”in bu matçda qalib gəlmək şansı böyükdür”. Bunu futbolinfo.az saytına açıqlamasında “Qəbələ”nin və “Neftçi”nin fransalı sabiq futbolçusu Baqali Dabo deyib.
Forvard bu gün Avropa Liqasının əsas mərhələsinin 5-ci turunda baş tutacaq “Qarabağ” – “Olimpik” (Lion) matçından danışıb. O, həmyerlilərini üstün sayıb: “Amma “Qarabağ” Avropa təcrübəsi olan və bu cür turnirlərdə qələbə qazanmağı bacaran komandadır. Bu səbəbdən bizi maraqlı və yaxşı oyun gözləyir”.
Dabo lionluların maddi çətinliklər yaşamasına baxmayaraq, bunun meydandakı oyunlarına təsir etmədiyini bildirib: “Fikrimcə, bu, matça hər hansı təsirini göstərməyəcək. “Olimpik”in futbolçuları peşəkardır, onlar meydanda necə oynamaq lazım olduğunu bilirlər. Bütün diqqətlərini “Qarabağ”la matça yönəldəcəklər”.
Qeyd edək ki, “Qarabağ” – “Olimpik” matçı bu gün saat 21:45-də başlayacaq.