“Qarabağ”ın sabiq yarımmüdafiəçisi Rahid Əmirquliyevin futbolinfo.az saytına müsahibəsi
- Bu gün Avropa Liqasının Liqa mərhələsində “Lion”u qəbul edəcək “Qarabağ”dan hansı nəticəni gözləyirsiniz? Sabiq komandanız ötən turdakı kimi, bu dəfə də qələbə qazana biləcək?
- Hamımız başa düşürük ki, “Qarabağ”ı elə-belə komanda ilə oyun gözləmir. “Lion” Fransa çempionatında, həmçinin Avropada sözünü demiş klubdur. “Qarabağ” üçün ağır matç olacaq. Amma təmsilçimiz “Bodo Qlimt”lə görüşdə göstərdi ki, istənilən rəqibə qarşı yaxşı futbol oynaya bilər. Bu mənada, nə qədər çətin görüş olsa belə, “Qarabağ”ın meydanı 3 xalla tərk edəcəyinə inanıram.
- “Qarabağ” “Lion”u nəyin hesabına üstələyə bilər?
- Həqiqətən, “Lion” adlı-sanlı klubdur. Bizim üçün çətin olacaq. Ancaq “Qarabağ”ın üstünlüyü odur ki, rəqibi evdə qəbul edir. İnanıram ki, azarkeşlər təmsilçimizi tək qoymayacaqlar və tribunaları dolduracaqlar. Azarkeş amili futbolda böyük rol oynayır.
- “Qarabağ”ın heyətində kimin bu gün qol vuracağına inamınız böyükdür?
- “Qarabağ”ın heyətində bu oyunda fərqlənə biləcək çox futbolçu var. Onların arasında ən çox qol vurmaq ehtimalı Juninyodadır.
- İlk 3 məğlubiyyətdən sonra “Qarabağ”ın Avropa Liqasında pley-offa yüksələcəyinə inam xeyli azalmışdı. Ancaq “Bodo Qlimt” üzərindəki qələbə vəziyyəti bir qədər dəyişdi. “Qarabağ”ın pley-offa yüksəlmək şansı nə qədərdir?
- “Qarabağ” Liqa mərhələsinə pis nəticələrlə başladı. Çox istərdik ki, məğlub olduğu oyunlarda, xüsusən, Bakıdakı matçlarda xallar qazansın. Ancaq alınmadı. Tilsimi “Bodo Qlimt”lə görüşdə qıra bildilər. İnanıram ki, həmin qələbənin ardı gələcək və “Qarabağ” evdə “Lion”u məğlubiyyətə uğradacaq. Bugünkü görüş pley-offa çıxmaq üçün olduqca vacibdir. “Qarabağ” bunu dərk edir. “Bodo Qlimt”lə matçdakı qələbədən sonra komandanın inamı artıb.
- Vaxtilə “Qarabağ”ın mərkəz yarımmüdafiəçilərindən olmusunuz. Hazırda Ağdam klubunda bu mövqedə çıxış edən hansı futbolçunu daha çox bəyənirsiniz?
- Mənim vaxtımda yarımmüdafiənin mərkəzində həm yerlilər, həm də legionerlər çıxış edirdi. Həmin futbolçulardan təkcə Riçard Almeyda qalıb, o da oynamır. Komandanın hazırkı mərkəz yarımmüdafiəçiləri arasında ən bəyəndiyim Marko Yankoviçdir. Onun oyunu çox xoşuma gəlir. Düzdür, Julio Romaonun da dağıdıcılığı əladır. Ancaq Yankoviçdə yaradıcılıq da yüksək səviyyədədir. Yassin Benzianı da mütləq qeyd etməliyəm. Benzia Yankoviçdən geri qalmır.