UEFA Avropa Liqasının Liqa mərhələsinin VI turu çərçivəsində keçiriləcək “Elfsborq” (İsveç) – “Qarabağ” matçından öncə təşkil ediləcək mətbuat konfransı və açıq məşqin vaxtı məlum olub.
Futbolinfo.az Ağdam klubunun rəsmi saytına istinadən xəbər verir ki, komandanın baş məşqçisi Qurban Qurbanovun iştirakı ilə keçiriləcək mətbuat konfransı bu gün yerli vaxtla saat 18:40-da (Bakı vaxtı ilə 21:40) baş tutacaq. 19:00-da (22:00) isə media nümayəndələri üçün açıq məşq (ilk 15 dəqiqə) keçiriləcək.
Azərbaycan çempionunun heyətində öncədən zədəli olan Aleksey İsayev, Kevin Medina və oyunun hazırlığı zamanı zədələnən Bəhlul Mustafazadə sabahkı görüşü buraxacaqlar. İsayev qasıq nahiyəsindən əməliyyat olunub, Medinaya baldır əzələsinin gərilməsi diaqnozu qoyulub. Mustafazadədə isə bud arxa əzələsinin gərilməsi ucbatından təxminən 4-6 həftə yaşıl meydanlardan kənar qalacaq.
Qeyd edək ki, sabah keçiriləcək “Elfsborq” – “Qarabağ” oyunu Bakı vaxtı ilə saat 00:00-da başlayacaq.