II Liqada mübarizə aparan “Hypers Guba” klubunun ev oyunlarının keçirdiyi Quba Olimpiya Kompleksinin stadionununa qış fasiləsindən sonra işıqlandırma sistemi qurulacaq.
Bunu futbolinfo.az saytına komandanın prezidenti Ayaz Abdullayev deyib: “Qış fasiləsindən sonra Quba Olimpiya Kompleksinin stadionunda işıqlandırma sistemini bərpa etmək istəyirik.İstəyimiz oyunlarımızı axşam saatlarında oynamaqdır. Düşünürük ki, oyunlarımızı axşam saatlarında oynasaq, stadiona azarkeşlər də çox gələcək, komandamıza dəstək olacaq. Yanvar ayından işlərə start veriləcək”.
Ayaz bəy əsas məqsədlərinin qış fasiləsində komandaya yeni baş məşqçi təyinatını reallaşdırmaq olduğunu bildirib: “Bu mövsüm iki baş məşqçi ilə yollarımızı ayırdıq. Qış fasiləsində yeni baş məşqçi komandamızın “sükanı arxasında” olacaq. Artıq 3-4 məşqçi ilə danışıqlar gedir. Yeni məşqçi ilə komandamızın heyətini də gücləndirəcəyik. Çalışacaq ki, növbəti mövsümdən Qubada yeni baza tikintisinə start verək və komanda olaraq rayonda məskunlaşaq”.
BƏHRUZ MUSAYEV