Dünya reytinqinin keçmiş bir nömrəsi və “Böyük Dəbilqə” yarışlarının 22 qat qalibi, ispan tennisçi Rafael Nadal “Next Gen ATP Finals” üçün Ciddəyə gələcək. Bu barədə İspaniyanın AS nəşri xəbər verir.
Bu il Nadal Səudiyyə Ərəbistanı Tennis Federasiyasının səfiri olub. Mənbənin sözlərinə görə, bu, ispaniyalının karyerasını başa vurduqdan sonra təşrif buyuracağı ilk tennis yarışı olacaq.
“Next Gen ATP Finals” dekabrın 18-dən 22-dək keçiriləcək. Burada ATP reytinqində 20 yaşa qədər ən yaxşı səkkiz oyunçu çıxış edəcək. Turnirin mükafat fondu 2 milyon 50 min dollar təşkil edir.
Turnirdə builki iştirakçılar aşağıdakılardır: Artur Fis (Fransa), Aleks Mişelsen (ABŞ), Yakub Menşik (Çexiya), Jionqşenq Şanq (Çin), Lehner Tin (ABŞ), Luka Van Aş (Fransa), Nişeş Basavareddi (ABŞ), Joao Fonseka (Braziliya).