“Turan Tovuz”un hücumçusu Sadiq Şəfiyevin futbolinfo.az saytına müsahibəsi
- 2024-cü ilin son matçında Tovuzda “Neftçi” ilə heç-heçə (1:1) oynadınız. Bu görüşü ehtiyat oyunçular skamyasından izlədiyiniz üçün məyus oldunuzmu?
- Hər iki tərəf üçün də maraqlı oyun alındı. Bizim daha çox qol şanslarımız olsa da, onlardan istifadə edə bilmədik. Futbolda belə hallar olur. Bunların üzərində çalışıb daha yaxşı olacağıq. O ki qaldı görüşü ehtiyat oyunçular skamyasından izləməyimə, hər zaman motivasiyamı yüksək tuturam. Məşqçi mənə nə zaman şans versə, bundan maksimum yararlanmağa çalışıram.
- “Turan Tovuz”un çempionatın ilk yarısındakı çıxışını necə qiymətləndirirsiniz? Sizcə, daha çox xal toplaya bilərdiniz, yoxsa qışadək maksimumu bacardınız?
- Əlbəttə, daha çox xal toplaya bilərdik. Bununla belə, çempionatın ilk hissəsini aktivimizə yazmaq olar. Amma mövsüm uzundur. Buna görə də, qalan matçlara son oyunumuz kimi çıxmalıyıq.
- Qışaqədərki öz performansınızı necə dəyərləndirirsiniz? Mövsümün ikinci yarısında daha çox oynamaq imkanı əldə etməyi bacaracaqsınız?
- Əlimə düşən imkanlardan istifadə etməyə çalışdım. Hələ yolun başındayam. Üzərimdə dayanmadan çalışaraq, daha çox forma şansı qazanmaq istəyirəm.
- Digər komandalar qış fasiləsində Azərbaycanda qalacaqları halda, “Turan Tovuz” təlim-məşq toplanışı üçün Türkiyəyə yollanacaq. Bu, sizə rəqiblərinizlə müqayisədə mövsümün ikinci yarısına daha yaxşı hazırlaşmaq imkanı verəcək?
- Əlbəttə, verəcək. Biz bundan maksimum istifadə etməyə çalışacağıq. Necə olacağını çempionatın sonunda görəcəyik.
- Artıq yarım mövsümdür ki, Kurban Berdıyevlə çalışırsınız. Məşqlərdə və oyunlarda futbolçulardan əsas nəyi tələb edir? Buvaxtadək onu ən əsəbi halda nə vaxt – hansı oyun zamanı və ya oyundan sonra görmüsünüz?
- Kurban Berdıyev çox tələbkar məşqçidir. Onun elə olmağı bizim üçün də yaxşıdır. Çünki işimizə daha məsuliyyətli yanaşırıq. “Əsəbi olur” deməyək, sadəcə, hansısa oyunda mübarizə aparmırıqsa, onda bizdən daha çox mübarizə aparmağımızı istəyir.
- Çempionatın ikinci hissəsinə Qərb derbisi ilə başlayacaqsınız. “Kəpəz”lə görüşdən 3 xalla ayrıla biləcəksiniz?
- Qerb derbiləri həmişə maraqlı olur. “Kəpəz”lə növbəti matça da yüksək motivasiya ilə hazırlaşacağıq. Meydana qələbə qazanmaq üçün çıxacağıq.
AĞA