MBA-da bu gecə 13 oyun baş tutub.
Qərb konfransında liderlər qrupunda yer alan “Hyuston Rokets” doğma arenada “Nyu-Orlean Pelikans”ı 133:113 hesabı ilə məğlub edib. Türkiyəli Alperen Şengünün aktivində 23 xal, 9 ribaund və 7 asist var.
Son çempion “Boston Seltiks” doğma arenada “Çikaqo Bulls”la bacarmayıb – 109:117. Digər oyunlar arasında Dallas və Denver komandalarının məğlubiyyətlərini qeyd etmək olar. “Maveriks” “Los-Anceles Klippers”ə 95:118 hesabı ilə uduzub. “Naggets” isə “Portlend Treyl Bleyzers”lə bacarmayıb – 124:126.
Digər bir maraqlı nəticə “Memfis Qrizlis”in “Qolden Steyt Vorriors”u 51 xal fərqilə məğlub etməsidir – 144:93. Qonaqların lideri Stiv Karri karyerasının antirekordunu yaşayaraq oyunda cəmi 2 xal toplayıb. Memfis komandasının ispan basketbolçusu Santi Aldama isə dabl-dablla yadda qalıb.