“Səbail”in yeni transferi Mirabdulla Abbasovun futbolinfo.az saytına müsahibəsi
– “Səbail”ə qayıdışınızla bağlı hissləriniz necədir? Bu transfer sizin üçün hansı mənanı daşıyır?
– Uzun müddət futboldan uzaq qaldıqdan sonra mənə inanıb, komandaya dəvət edən məşqçilər heyəti və klub rəhbərliyinə təşəkkür edirəm. Əlimdən gələni edərək bu etimadı artıqlaması ilə doğrultmağa çalışacağam.
– Keçmişdə iki dəfə “Səbail”də çıxış etmisiniz. İndi komandaya yenidən qoşulmaq əvvəlki dövrlərdən nə ilə fərqlənir?
– Böyük fərqlər yoxdur. Əsas məqsədim optimal formamı bərpa edib komandaya faydalı olmaqdır. “Səbail”də keçmişdə yaddaqalan anlar yaşamışam, amma indi yeni uğurlar qazanmağa fokuslanmışam.
– Cari mövsümün sonuna qədər müqavilə imzalamısınız. Bu müddət ərzində əsas hədəfləriniz nələrdir?
– Əsas hədəfim komandaya bu çətin mübarizədə maksimum dəstək verməkdir. Eyni zamanda özümü yaxşı tərəfdən göstərmək istəyirəm ki, mövsümün sonunda klubdan yeni təklif alım. Komandaya adaptasiya mənim üçün asandır, çünki həm məşqçilər heyəti, həm də futbolçuların bir çoxu ilə öncədən tanışam.
– Hazırda özünüzü hansı formada hiss edirsiniz? “Səbail” üçün nələr edə bilərsiniz?
– İdeal formama hələ çatmamışam, amma bunun üçün əlimdən gələni edirəm. Məşqçilərin dəstəyi və öz səylərimlə bu prosesi mümkün qədər tez tamamlamağa çalışıram. Formamı bərpa etdikdən sonra komandaya faydalı olacağıma inanıram.
– Komandanın hazırkı mövqeyi və mövsümün qalan hissəsindəki hədəfləri ilə bağlı nə düşünürsünüz?
– Əsas hədəfimiz Premyer Liqada mövqeyimizi qorumaqdır. Bununla yanaşı, mümkün qədər yüksək pillədə mövsümü başa vurmaq üçün çalışacağıq.
– Uzunmüddətli planlarınızda “Səbail”də qalmaq yer alırmı, yoxsa bu qısa müddətli bir mərhələ kimi baxırsınız?
– Hazırda əsas diqqətimi yaxın gələcəyə yönəltmişəm. “Səbail” mənim üçün doğma bir klubdur və burada uzun müddət qalmaq mənim üçün xoş olar.
– Fərdi olaraq mövsümə hansı məqsədlərlə başlamağı düşünürsünüz?
– Bir hücumçu kimi əsas məqsədim mümkün qədər çox qol vurmaq və asistlər etməkdir. Bununla komandamızın uğurlarında pay sahibi olmağı hədəfləyirəm.
– Azarkeşlərə hansı mesajı çatdırmaq istərdiniz? Onların dəstəyi sizin üçün nə qədər önəmlidir?
– İlk növbədə azarkeşlərə dəstəklərinə görə təşəkkür edirəm. Komandanın həm çətin, həm də yaxşı günlərində bizim yanımızda olublar. Onlardan xahişim odur ki, bizə inanmağa davam etsinlər. Biz də öz oyunumuzla onları sevindirməyə çalışacağıq.
GÜNAY SÜLEYMANOVA