“Şamaxı” klubunun hücumçusu Leroy Mikelsin futbolinfo.az saytına müsahibəsi
– Qış fasiləsindən necə yararlandınız? Komandanız mövsümün ikinci yarısına tam hazırdır?
– Məşqlər yaxşı keçir. Hamı özünü yaxşı tərəfdən göstərmək üçün əlindən gələni edir. Hər birimiz oyunlar üçün darıxmışıq və tezliklə meydana çıxmaq üçün səbirsizlənirik.
– “Şamaxı”nın qış fasiləsinə qədər sərgilədiyi performans sizi qane etdimi? Yoxsa düşünürsünüz ki, daha çox xal toplaya bilərdiniz?
– Mövsümün ilk yarısındakı çıxışımızdan razıyam. Fikrimcə, heç kəs bizim fasiləyə 7-ci pillədə yollanacağımızı təxmin etmirdi. Əlbəttə, daha çox xal toplaya bilərdik. Yəqin ki, digər komandalar da özləri ilə bağlı bu fikri səsləndirərlər. Hazırkı vəziyyətimizə görə xoşbəxtik. Çalışacağıq ki, sezonun ikinci hissəsində daha yaxşı performansla yadda qalaq.
– Qış fasiləsindən sonra çempionatda ilk oyununuz “Qarabağ”a qarşı olacaq. Bu görüşdə hansı nəticəyə ümid edirsiniz? “Şamaxı” sürprizə imza ataraq güclü rəqibindən xal ala bilərmi?
– Səfərdə oynayacağıq. Bu mənada, matçdan xalla ayrılmaq asan tapşırıq olmayacaq. Rəqibimizə hörmətlə yanaşırıq. Ancaq digər görüşlərdə olduğu kimi, bu oyunda da maksimum nəticəyə nail olmaq üçün əlimizdən gələni edəcəyik.
– “Şamaxı” fasilə müddətində heyətinə yeni futbolçular cəlb etdi. Sizcə, onların gəlişi “Şamaxı”nı gücləndirəcək?
– Onların bizə nə qədər güc qatacaqlarını dəqiq bilmirəm. Sadəcə, onu deyə bilərəm ki, yeni transferlərin gəlişindən məmnunam. İlk növbədə, hər biri yaxşı xarakterə sahibdir. Bu isə komandamız üçün hazırda ən vacib məqamdır.
– Mövsümün ikinci yarısı ilə bağlı planınız nədən ibarətdir? Qarşınıza konkret hansı tapşırıq qoyulub?
– Əsas hədəfimiz liqada qalmaqdır. Bundan artığını bacarmaq isə bizim üçün bonusdur.
– “Qarabağ”da özünü yaxşı tərəfdən göstərən Olavio Juninyo “Sevilya” kimi tanınmış klubdan təklif alsa da, sonda “Flamenqo”ya keçməyi üstün tutdu. Azərbaycan Premyer Liqasında çıxış edən futbolçulara xarici klublardan marağın artması yəqin ki, sizi də sevindirir. Yaxın müddətdə sizə də tanınmış klublardan təklif gələcəyinə inanırsınız?
– Juninyoya görə sevinirəm. Çünki yaxşı futbolçudur və öz çıxışı ilə diqqət mərkəzində olmağa layiqdir. Əlbəttə ki, bu cür təkliflər almaq mənim də arzumdur. Bundan sonra da qarşıma mümkün qədər ən yüksək hədəflər qoyacağam və onlara çatmaq üçün çalışacağam.
CAVAD