MBA-da bu gecə 11 oyun baş tutub.
Nikola Yokiçin yoxluğunda “Denver Naggets” doğma arenada ağır məğlubiyyətə düçar olub. “Hyuston Rokets” güclü rəqibinə aman verməyib – 128:108. Qonaqlar fasiləyə qədər üstünlüklərini 21 xala çatdıraraq sona qədər qorumağı bacarıblar. Alperen Şengünün tripl-dabl etməsinə 1 ribaund və 2 asist çatmayıb. O, qarşılaşmanı 21 xal , 9 ribaund və 8 asistlə tamamlayıb. Ceylen Qrin isə 34 xal toplayıb.
Digər oyunlar arasında “Boston Seltiks”in Torontoda məğlubiyyətini (98:110) qeyd etmək olar. Los-Ancelesin hər iki komandası da gecəni qələbəylə tamamlayıb. “Leykers” Mayami komandasına 117:108, “Klippers” isə “Bruklin Nets”ə 126:67 hesabı ilə qalib gəlib.
Ən gərgin qarşılaşma “Filadelfiya Siksers” və “Nyu-York Niks” komandaları arasında olub. Oyunun taleyi overtaymda həll edilib. Qonaqlar 125:119 hesabı ilə qələbə qazanıblar.