“İdman” TV ölkə futboluna diqqəti artırır. İllərdir daxili çempionata daha az yer ayıran, “CBC Sport”un yaradılması və yayım hüququnun bu kanala verilməsi ilə küskün görünən həmkarlarımız buzları əridib.
Artıq I Liqa ilə bağlı verilişin ilk buraxılışı efirə gedib. Yaxşı təşəbbüsdür. Veriliş davamlı, həftəlik olsa, əla olar. Bölgə komandalarının üstünlük təşkil etdiyi yarış haqda verilişin azarkeşlər tərəfindən xüsusi həvəslə izlənəcəyi şübhə doğurmur.
Təbliğat öz yerində, verilişdə hakimlik, futbolçuların çıxışları, məşqçi işi, təşkilatçılıqdakı problemlər müzakirə olunsa, sağlam tənqidlərə yer verilsə, liqanın və futbolumuzun xeyirinə olacaq. Efirlərdə heç kimə lazım olmayan öküz yarışları, hansısa xarici futbol çempionatının oyununun 100-cü dəfə təkrar göstərilməsindəsə belə verilişlərin olması futbolumuz üçün daha faydalıdır.
Davamlı olsun!..