“Qarabağ”ın sabiq hücumçusu Rauf Əliyevin futbolinfo.az saytına müsahibəsi
– “Qarabağ” Avropa Liqasının Liqa mərhələsində Bakıda Rumıniyanın FCSB klubuna uduzdu (2:3). Matç ərzində 2 dəfə hesabda önə keçsək də, yekunda məğlubiyyətlə üzləşməyimizin səbəbini nədə görürsünüz?
– Məğlubiyyətin əsas səbəbi asan qollar buraxmağımız idi. Onsuz da, standart vəziyyətlər bizim futbolumuzun yaralı yeridir. “Qarabağ” da həmişə bu tərəfdən əziyyət çəkib. Cərimə meydançası daxilində rəqib futbolçunu boş buraxmaq müdafiə olunan oyunçularımızın böyük səhvi idi. “Qarabağ” hər üç epizodda asan qollar buraxdı.
– FCSB ilə görüşdə Olavio Juninyonun yoxluğu çox hiss olundu?
– Komanda 2 qol vurubsa, deməli, gedişi o qədər də təsir etməyib. Əgər qol vura bilməsəydilər, deyərdik ki, Juninyonun yoxluğu çox hiss olundu. Onda bu məqam qabarıq şəkildə görünəcəkdi. Amma “Qarabağ” rəqib qapısından iki top keçirdi. Əlbəttə ki, Juninyo təmsilçimiz üçün çox vacib futbolçu idi. Həqiqətən də yaxşı hücumçudur. Amma düşünürəm ki, “Qarabağ” indi olmasa belə, yayda Juninyonun yerini layiqincə doldura bilən futbolçu tapacaq.
– Bu oyunda “Qarabağ”ın heyətində hansı futbolçular yaxşı mənada fərqləndilər?
– 2-3 nəfəri qeyd edə bilərəm. Elvin Cəfərquliyev və Marko Yankoviçin adını çəkərdim. Kevin Medina da həmişəki kimi, birəbir epizodlarda pis təsir bağışlamadı. Amma futbolda nəticə olmayanda kiminsə fərdi şəkildə ön plana çıxmasının mənası qalmır.
– “Qarabağ”ın Avropa Liqasının Liqa mərhələsindəki çıxışı ümumilikdə uğursuz alındı. Bunun başlıca səbəbləri hansılardır?
– Fikrimcə, “Qarabağ” Liqa mərhələsində çox böyük şanssızlıqlar yaşadı. Elə oyunlar oldu ki, təmsilçimiz üstün təsir bağışlasa da, yekunda məğlubiyyətlə üzləşdi. FCSB ilə matçı da bu görüşlər sırasına qatardım. Digər məqam isə bəzi görüşlərdə tam heyətlə oynaya bilməmək, zədəlilərin çoxluğu idi. Bu cür amillər “Qarabağ”ın builki avrokubok nəticələrinə böyük təsir göstərdi.
– Əksəriyyət bu fikirdədir ki, “Qarabağ”ın heyəti gücləndirilməlidir. İndiki halda daha çox hansı mövqelərdə boşluqlar görünür?
– Bəli, transferlərin lazım olduğuna dair fikirlər tez-tez təkrarlanır. Rəhbərlik və baş məşqçi də yeni transferlər lazım olduğunu çox yaxşı bilir. Bunu da həyata keçirəcəklər. Sadəcə, qışda yaxşı futbolçular tapmaq çətindir. Çünki yaxşı oyunçuların öz klubları ilə müqavilələri olur. Yaxşı transferləri daha çox yayda etmək mümkündür. Məncə, “Qarabağ” yayı gözləyəcək. Mövqelərə gəlincə, müdafiəçi və hücumçu mütləq lazımdır. Fikrimcə, “Qarabağ” ən azı 3 transfer gerçəkləşdirəcək.
FƏRİD