“Gərgin oyun oldu. Meydançada yüksək mübarizə var idi. Təəssüf ki, məğlub olduq. Daha məsuliyyətli davranaraq əlimizə düşən fürsətlərdən istifadə etməli idik. Bu cür məğlubiyyətlərdən dərs çıxarmaq bizim üçün vacibdir”. Bu sözləri futbolinfo.az saytına açıqlamasında “Səbail” – “Kəpəz” (1:0) oyunundan sonra qonaqların futbolçusu Rauf Hüseynli deyib.
Müdafiəçi səhvlər üzərində ciddi şəkildə işləyərək növbəti oyunlara daha hazırlıqlı çıxmağa çalışacaqlarını bildirib: “Səhvlərimiz üzərində çalışaraq növbəti görüşlərə daha yaxşı hazırlaşacağıq. Biz “Kəpəz” olaraq, hər zaman azarkeşlərimizin dəstəyini hiss edirik və bu, bizi daha da motivasiya edir. Qarşıda bizi çətin oyunlar gözləyir, amma hər birinə maksimum diqqətlə yanaşacağıq”.
Hüseynli həmçinin çempionatın hələ uzun olduğunu və vəziyyəti düzəltmək üçün kifayət qədər vaxtlarının qaldığını qeyd edib: “Çempionat uzun marafondur. Vəziyyəti düzəltmək üçün hələ qarşıda çox oyunlarımız var. Bunun üçün əlimizdən gələni etməyə hazırıq. İndi əsas məqsədimiz daha çox çalışmaq və komandanın oyununu yaxşılaşdırmaqdır. Növbəti rəqibimiz “Sabah”dır. Motivasiyamız azalmayıb, tam əksinə, qələbə üçün daha həvəsliyik. Çalışacağıq ki, azarkeşlərimizi sevindirəcək nəticələr əldə edək”.
GÜNAY SÜLEYMANOVA