Bir neçə gündür sosial şəbəkələrdə “Qarabağ”ın müdafiəçisi Elvin Cəfərquliyevin müxtəlif klublardan təklif aldığı barədə xəbərlər yayılıb. İtaliyanın məşhur klublarından “Torino”, A Seriyasının digər komandası “Komo”, Polşanın “Lex” (Poznan) və Macarıstanın “Ferentsvaroş” klublarının Azərbaycan yığmasının üzvü üçün hərəkətə keçdiyi bildirilir.
Lakin maraqlıdır ki, “Qarabağ” rəsmiləri bu xəbərləri açıqlamalarında təkzib ediblər. Onlar Cəfərquliyev üçün heç bir rəsmi təklif almadıqlarını bildiriblər. Buna baxmyaraq, sosial şəbəkələrdə bu mövzu səngimək bilmir.
Bunları nəzərə alaraq, adıçəkilən klublara “Sizin klubunuzun Azərbaycan yığmasının üzvü Elvin Cəfərquliyevi transfer etmək istədiyi barədə xəbərlər var. Adıçəkilən futbolçu ilə maraqlanmısız və ya onu tanıyırsız” sualını ünvanladıq.
“Komo” klubunun idman direktoru Karlalberto Ludi cavabında futbolçunu tanımadığını bildirdi: “Xeyir, üzr istəyirəm, amma mən bu futbolçunu tanımıram”.
“Lex”in mətbuat xidmətinin rəhbəri Maciej Hensz isə futbolçunu tanısa da, transfer barədə xəbəri təkzib etdi: “Əlbəttə ki, Elvin Cəfərquliyevi tanıyıram. Çünki biz “Qarabağ”a qarşı oynamışıq və o da heyətdə olub. Amma azərbaycanlı müdafiəçini transfer edəcəyimiz xəbərləri doğru deyil”.
“Torino” klubunun idman direktoru Davide Vaqnati də Elvini tanımadıqlarını açıqladı: “Xeyr, onu tanımıram və maraqlanmamışıq”.
“Ferentsvaroş” klubundan isə suala ümumiyyətlə cavab vermədilər.
Cəfərquliyev hazırda Azərbaycanın ən yaxşı oyunçularından biri olsa da, bu cür xəbərlərin yayılması onun karyerasına zərər vura bilər. Amma müdafiəçiyə marağın olduğu dəqiqdir. Yəqin ki, yayda Cəfərquliyevin transferi ilə bağlı daha çox xəbər eşidəcəyik.
AĞA
