Ölkə futbolu
Rəngarəng “Seltik”i necə “kötəkləmək” olar?
Sabah “Qarabağ” Çempionlar Liqasının 3-cü …
Sabah “Qarabağ” Çempionlar Liqasının 3-cü təsnifat mərhələsinin ilk oyunu çərçivəsində “Seltik”in qonağı olacaq. Şotlandiya çempionu cütlüyün favoriti olsa da, Qurban Qurbanovun komandasının da rəqibə qarşı əks-“arqument”ləri var.
Məşhur bukmeker kontorları britanıyalıların qələbəsinə 1,45 əmsalı verdiyi halda, “Qarabağ”ın səfərdən üstün dönməsini 6,50 ilə ölçüblər. Qarşılaşmanın heç-heçə bitməsi əmsalı isə 4,33-dü.
Mərc kontorlarının “yubkalılar”ı aşkar favorit göstərməsinin bir neçə səbəbi var. Əvvəla, zəngin tarixə malik olmaları. İkincisi, Şotlandiya çempionunun heyətində yer alan futbolçuların səviyyəsi. Nəhayət, 3-cü və ən əsas məqam odu ki, “Seltik” doğma meydanda oynaycaq.
“Zolaqlılar”ın döyünən ürəyi türkəsilli hollandiyalı Nadir Çiftçidi. Gözəl texnikaya malik “7 nömrə” hiyləgər ötürmələri ilə də rəqib komandaların başağrısına çevrilə bilir. 23 yaşlı futbolçu Türkiyənin U-19 yığmasına cəlb edilsə də, sonradan heç bir yığma komandada forma geyinməyib. Maraqlıdı ki, Çiftçi növbəti Şotlandiya çempionatının ilk 6 turunda forma geyinə bilməyəck. O, “Dandi” ilə ötən mövsüm son çempionat oyununda rəqib futbolçunun ayağını dişləyib. Baş hakim epizodu diqqətdən qaçırsa da, Şotlandiya Futbol Assosiasiyası yerdə qalan Çiftçinin onun üstünə yıxılan rəqibinin baldırını dişlədiyini üzə çıxarıb. Görünür türkəsilli holland heç olmasa bu sahədə Luis Suareslə tənləşmək arzusuna düşüb.
Komandanın aparıcı simalarından daha biri Mikael Lustiqdi. Cinah müdafiəçisi mövqeyində çıxış edən İsveç yığmasının 29 yaşlı futbolçusu hücumlara çox fəal şəkildə qoşulur. Standart vəziyyətlər zamanı isə daim rəqib komandanın cərimə meydançasında uca – 189 sm boyundan istifadə etməyə çalışır.
“Seltik”in oyun üslubu da olduqca maraqlıdı. Komanda cinahlarla, geniş oynamaqdan zövq alır. Nəzərə alsaq ki, “Qarabağ” kompakt, texnikalı futbola üstünlük verir, bu, Şotlandiya çempionuna üstünlük qazandırır. Ancaq ən maraqlısı budu ki, “zolaqlılar” qısa “paslaşma”larla da rəqib müdafiəsini yarmağa qadirdilər. Bütün hallarda “2-ci mərtəbə” üstünlüklərindən istifadə etməyi də unutmurlar. Özü də cinah ötürmələrini kortəbii etmirlər, komanda yoldaşlarını topla təmin etməkdə zərgər dəqiqliyi ilə seçilirlər.
“Seltik”in yeganə çatışmayan cəhəti böyük qüvvəylə irəli atılmasıdı. “Qarabağ” isə əks-hücumlar zamanı olduqca təhlükəli olmağı bacarır. Qurban Qurbanovun komandası məhz bu üstünlüyündən lazımınca istifadə edə bilsə, favoriti evində yaxşıca kötəkləyə bilər.
CEYHUN ƏLİYEV
- Ölkə futbolu2024-06-01 08:30
Almeyda “Qarabağ”da qalır
- Ölkə futbolu2024-06-01 09:25
“Şamaxı” Ramiz Məmmədova xələf axtarır
- Milli komanda2024-05-31 16:45
Vayss millimizə rəhbərlik etməyəcək: yerlilər arasından seçim edilə bilər
- Ölkə futbolu2024-06-01 10:02
“Turan Tovuz” əcnəbi məşqçi axtarır: “Kəpəz” Şükürova icazə vermədi