Ölkə futbolu
Belə sponsordan olmaz!..
PFL-lə Premyer Liqaya dair müqavilə imzalayan “Topaz&rdqu…
PFL-lə Premyer Liqaya dair müqavilə imzalayan “Topaz”dan xəbər-ətər yoxdu. Yox-yox, məntəqələri fəaliyyət göstərir. Ancaq sponsor kimi bannerləri görünmür. Çempionatın 2 turu arxada qalıb, amma “Topaz”ı azacıq da görən tapılmayıb.
Fakt budu ki, şirkət PFL-ə müəyyən vəsait köçürməlidi. Çempionatda 28 tur olacaq. Bu da 112 oyun deməkdi. Sözügedən qarşılaşmaların 8-i arxada qalıb, daha 4-ü qapını döyür. Demək ki, çempionat oyunlarının təxmini 10 faizi arxada qalacaq. Bəs, hanı bu “Topaz”? Reklama ətək-ətək pul tökürlərsə, deməli, bunun qarşılığını da görməlidilər axı!
Rəsmi baxsaq, 2 cavab görürük: ya mərc şirkəti səpələdiyi pulun qarşılığını axtarmır və çempionatın keçirilməsinə məsul quruma bannerlərini təqdim etməyib, ya da PFL müqavilə şərtlərini yerinə yetirmir. Hər iki halda, “Topaz”ın qeyri-peşəkarlığı faktı üzə çıxır. Bannerləri təqdim edibsə, nəyə görə yerləşdirilməsini tələb etmir? Bannerlərini verməyibsə, nəyə görə 10 faizlik itkiyə məruz qalır?
Bəlkə heç biri deyil və məsələnin qeyri-rəsmi tərəfi var? Deyək ki, ölkə çempionatında iştirakçıların sayı 8-ə endikdən sonra Premyer Liqaya sponsorluq etmək heç bir quruma maraqlı gəlməyib. Ancaq uzun illər çempionatın sponsoru olduqdan sonra birdən-birə bundan məhrum olmaq həm AFFA-ya, həm də PFL-ə reytinq baxımından mənfi təsir göstərəcəkdi. Deməli, çempionatın sponsoru ən azından, kağız üzərində də olsa, öz əksini tapmalı idi.
Az-çox PFL-lə işbirliyi olmuş şirkətlər arasında isə “Topaz” öncüllər sırasındadı. Böyük ehtimalla, “Topaz”la dostluq memorandumu imzalanıb. Məğzi də təxmini bu cür olub: “Adı Topaz Premyer Liqası kimi səslənsin, amma heç bir banner qoyulmayacaq. Təbii ki, buna görə heç bir vəsait də ödənilmir”.
Mərc oyunları bazarında monopoliyanın hökm sürməsi “Topaz”ın reklamsız da müştəri auditoriyasına sahib olmasını şərtləndirir. Ancaq təklif etdiyi şərtlər təbii ki, əksər oyunçuları bu kampaniyadan uzaq durmağa vadar edir. Rəqabətsizlikdə isə kef elə, nə tutsan, qənimətdi.
Elə bunun nəticəsidi ki, ilk 2 turda meydan sahiblərinin və səfər komandalarının yerləri eyni sayda dəyişsə də, “Topaz” bunu vecinə də almayıb. “Qarabağ” – “İnter” və “İnter” – “Qəbələ” oyunlarına dair yerdəyişmə haqda məlumat xeyli əvvəldən verilsə də, “Topaz” mərclərdə bunu nəzərə almayıb. İndi həmin mərcdən qalib ayrılan insanların durumunu təsəvvür edin. Məsələn, “Qarabağ”ın “İnter”ə məğlub olacağını təxmin edən oyunçu ertəsi gün uduşunu almağa gedir və “Topaz”dan ona “bu matç gündəlikdən çıxarılıb, meydan sahibi dəyişdiyi üçün əmsal 1.00-lə hesablanır” cavabı verilir. Niyə? Sənin monopolist qurumunun niyə oyunun yerinin dəyişdirilməsindən xəbərin yoxdu? Oyunçunun günahı nədi ki, sən işini peşəkar səviyyədə qura bilmədiyinə görə zərər çəksin? Özü də söhbət hansısa xarici çempionatdan getmir e, qılağının dibində, vətənin – Azərbaycan çempionatından danışırq və belədə, “xəbərimiz olmayıb” demək, gülüncdü!
Onsuz da mərc gələn insanlar hər qəpiyinin qədrini bilənlərdi. Onsuz da “Topaz”ın təqdim etdiyi əmsallar rüsvayçı idi. Onsuz da “Topaz”ın irəli sürdüyü “tək oyunları qəbul etmirəm” şərti absurd idi. İndi də “gülünü çıxardılar”. Nəvaxtsa ayılıb görəcəklər ki, “Bakı”nın aqibətini yaşamaqdadılar. Niyə məhz “Bakı”nın? Bir sualın cavabını da özünüz tapın.
CEYHUN ƏLİYEV
P.S.: Bütün bu suallara aydınlıq gətirmək, “İnter” – “Qarabağ” və “Qəbələ” – “İnter” oyunlarına əmsal açıqlamağına baxmayaraq, matç bitdikdən sonra onları ləğv etmələrinin səbəbini “Topaz” rəsmilərindən öyrənmək istərdik. Amma danışmaq üçün kimsəni tapa bilmirik.
- Ölkə futbolu2024-06-07 11:08
“Bu, Musa Qurbanlıya da aiddir”
- Ölkə futbolu2024-06-07 10:59
Klublarımızın yay transferləri – YENİLƏNİR
- Müsahibə2024-06-07 14:54
Cica “Qarabağ”da qalmaq istəyir: “Başqa məsələlər barədə nəsə deyə bilmərəm”
- Ölkə futbolu2024-06-06 09:30
Baş məşqçisi olmayan 3 klub: ikisi əcnəbi axtarır