Müsahibə
Rahid Əmirquliyev: "Qəbələ"nin qısa vaxtda bu qədər xal itirəcəyini gözləmirdik"
Topaz Premyer Liqasının 11-ci turunda səfərdə “Zirə”…
Topaz Premyer Liqasının 11-ci turunda səfərdə “Zirə” ilə qarşılaşan “Qarabağ” 2:0 hesablı qələbə qazanıb. Matçdan sonra qonaq komandanın yarımmüdafiəçisi Rahid Əmirquliyev futbolinfo.az saytının əməkdaşının da suallarını cavablandırıb:
– İlk hissə zəif təsir bağışladınız. Komanda ikinci yarıda oynamağa başladı…
– Üç gün qabaq ağır oyun keçirmişdik. Ondan da qabaq AZAL-la sintetik meydanda oynamışdıq. Bilirsiz ki, süni örtüklü qazon çox yorur. O səbəbdən də bir az yorğunluq var idi. Çətin oldu bizə. Şükürlər olsun ki, ikinci hissədə lazım olan qolları vura bildik.
– Günün digər oyununda “Qəbələ” də xal itirdi. Bununla da xallarınız bərabərləşdi. Bir neçə həftə əvvəl 6 xal olan fərq, artıq aradan qalxıb. Bu barədə nə düşünürsüz?
– Sözün açığı, digər oyunun nəticəsindən xəbərim yox idi. Ancaq bizim xeyrimizə olub.
– Gözləyirdinizmi ki, “Qəbələ” ardıcıl xallar itirəcək?
– Əslində, gözləmirdik. Ancaq göründüyü kimi çempionat həm “Qəbələ”, həm də bizim üçün çox çətin keçir. Mümkündü ki, bundan sonra da xal itkiləri olsun. Bizdə də, “Qəbələ”də də. Ona görə, diqqətli oynamalıyıq.
– Ancaq bu rəqabət iki komanda – “Qarabağ”la “Qəbələ” arasında gedir. Digər komandalar sanki bir az mübarizədən uzaq düşüblər…
– Doğrudur, “İnter” də mövsümə yaxşı başlamışdı, ancaq son oyunlar bir az büdrədilər. Düşünürəm ki, onları belə erkən silmək olmaz mübarizədən.
– Avroliqada və çempionatda üst-üstə xeyli oyun keçirdiyini nəzərə alsaq, milliyə yorğun gedirsən, yoxsa…?
– Yorğunluq var, ancaq millinin oyunununa kimi arada vaxt çoxdu. Dincəlməyə imkanımız olacaq.
– Şimali İrlandiya ilə oyunda şansımız var? İli yaxşı başa vurmaq üçün bu fürsətdən yararlanmaq olar?
– Ümid həmişə var. Çexiya ilə oyunda da favorit deyildik, ancaq yekunda istədiymiz nəticəni qazana bildik. Bu dəfə də çalışacağıq ki, əlimizdən gələni edək.
![blank](https://futbolinfo.az/wp-content/plugins/wp-fastest-cache-premium/pro/images/blank.gif)