Qurban Qurbanov: "Getdikcə bizə daha diqqətli yanaşırlar"

UEFA Çempionlar Liqasının qrup mərhələsi çərçivəsində səfərdə İspaniyanın “Atletiko” klubu ilə bərabərə qalan (1:1) “Qarabağ”ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavablandırıb. 

Futbolinfo.az xəbər verir ki, Qurbanov öncə oyunla bağlı fikirlərini bildirib:

– Ağır oyun oldu. Bir xal qazanmağımıza baxmayaraq, rəqib çox yaxşı oynadı. Bu cür oyunlarda futbolçularımın təcrübə qazanması mənim üçün çox önəmlidi. Rəqibin qol epizodları çox olsa da, yetirmələrim sonadək mübarizə apardılar. “Atletiko”ya gələcək oyunlarda uğurlar arzulayıram. 

– “Atetiko” ilə ilk oyunda da qırmızı vərəqə olmuşdu, bu dəfə də…
– İlk oyundan sonra demişdim – yalnış qərar idi. Ancaq məncə, bu dəfə hakim haqlı idi. Pedro ayağını çox yuxarı qaldırmışdı.  

– ÇL-in püşkü atıldıqdan sonra “Qarabağ” qrupun aşkar autsayderi kimi göstərilirdi. Ancaq komanda artıq iki xal qazanıb. Demək olar ki, komanda artıq əsas işin öhdəsindən gəlib? 
– Çox güclü qrupa düşmüşük. İlk 3 rəqibin də qrup birincisi olmaq potensialı var idi. Bizim üçün isə əsas təcrübədi. Belə oyunlar bizə zövq verir. Qarşıdakı oyunlarda da yaxşı oyun sərgiləməyə çalışacağıq. Əlbəttə, nəticə də önəmlidi. Dayanmaq istəmirik. Nəticəmizi daim inkişaf etdirmək istəyirik.

– Bu turnirdə iştirakın sizin üçün vacib olduğunu dediz. UEFA isə fərqli düşünür…
– Bu barədə nə isə deyə bilmərəm. Bu turnirdə iştirak etdikdən sonra istərdik ki, bundan sonra da hər il iştirak edək. Bəlkə də, gələcəkdə də bu turnirdə iştirak etmək üçün daha çox bərkiməliyik. Turnirlə bağlı nə qərar qəbul edilsə, buna riayət etməliyik.

– Pedronun qırmızı vərəqə alması, Geryenin zədələnməsi sizin planlarınızı pozdu? Bir də, sanki “Atletiko” ilə oyunlarımızda gərginlik bir qədər də artıq oldu… 
– İstər-istəməz itkilər komandanın planlarını pozur. Yenə zədədə bunu kompensasiya etmək olur. Lakin qırmızı vərəqədə bunu etmək mümkün olmur. Bu turnirdə iki dəfə ardıcıl azlıqda oynamaq futbolçularıma əlavə inam verdi. Məncə, bu, futbolçularımızın daha məsuliyyətli olması üçün əsas rol oynadı. Bu turnirdə gərgin olmayan oyun yoxdu. Burdakı rəqiblərimiz bizi buna məcbur edir.  

– Son illərdə ÇL-də “Atletiko”nu çox az komanda üstələyib. Bu komanda ilə ardıcıl iki dəfə heç-heçə etdiyinizə görə hansı hissləri keçirirsiz?
– Ümumiyyətlə futbolda hər nəticənin öz məsuliyyəti var. Bu hisslər imkan vermir ki, rahat olaq. Qarşıda bundan da ağır oyunlar var. Belə nəticələr bizə nə qədər inam verirsə, həm də, əlavə məsuliyyət qazandırır. Rahatlaşmırıq. İşimizə daha çox məsuliyyətlə yanaşmalıyıq. Çalışacağıq ki, bu cür nəticələr təsadüf yox, davamlı olsun.

– Komanda fasiləyə heç kimin gözləmədiyi halda 1:0 hesabıyla öndə yollandı. Fasilədə futbolçularınıza nə dediz?
– Hər hissənin öz analizi var. Oyundan öncə istənilən nəticəyə hazır oluruq. Matçdan öncə rəqibi analiz edirik. Qapımızda gördüyümüz qolların bir çoxuna bu tapşırıqlara düzgün riayət edilməməsi səbəb olur. Bunu burada açıqlaya bilmərəm. İkinci hissədə qol buraxsaq da, yaxşı oynadıq. 

– Heç kimə sirr deyil ki, “Qarabağ” bu gün ÇL-in ən az büdcəyə malik komandasıdı. Bu gün özünüzü daha böyük ölkələrin, məsələn, Türkiyə klublarında çalışmağa hansı dərəcədə hazır hiss edirsiz?
– Bu barədə düşünmürəm. Əsasən, buradakı işimi yaxşılaşdırmaq barədə düşünürəm. Belə təklif barədə düşünmürəm belə. Çalışıram ki, Azərbaycan futboluna kiçik də olsa, xeyir verim.