Ölkə futbolu
Daha faciəli sabah üçün ilk siqnallar
Uşaq liqalarında mövsüm yeni başlayıb, amma artıq 7 tex…
Uşaq liqalarında mövsüm yeni başlayıb, amma artıq 7 texniki məğlubiyyət var. 2 tur üçün bu, biabırçı mənzərədi.
İlk turda 3 komanda texniki məğlubiyyət almışdı, bu gün isə bəlli oldu ki, daha 4 komanda 0:3-ə üzüləcək. Həm də onlardan üçü U-11 liqasının təmsilçiləridi.
U-12 Liqasının “Leon” – EFA matçında qonaqlar iştirak etməyib. Onlara texniki məğlubiyyət verilməsi təbiidi, ancaq görəsən, AFFA-dakı səriştəsizlər startda büdrəyən belə bir komandanı hansı ağılla yarışa buraxıb?
U-11 Liqasının “Şirvanovka” (Qusar) – “Quba” OK (Quba) matçında meydan sahibləri eyni aqibəti yaşayıb. Çox maraqlı səbəblə: sən demə, “Şirvanovka”nın heyətində yetərsay yox imiş. Meydan sahibi komanda meydana buraxmağa oyunçu tapa bilmirsə, yarışa hansı əsasla buraxılıb? 140 minlik futbolçu ailəsi olan AFFA-dan bu suala cavab verən tapılsa, pis olmaz.
U-11 Liqasının “Neftçi” İK İB – “Polad” FK matçında başqa olay yaşanıb. SOCAR-ın maliyyəsi ilə yaşayan “Neftçi”nin məşqçiləri Tural Kərimov və Orxan Məmmədov hakimi təhqir etdiklərinə görə meydandan kənarlaşdırılıblar. Onlar 30-cu dəqiqədə komandanı da meydandan çıxarıb və texniki məğlubiyyətə səbəb veriblər.
Ola bilər ki, hakimlərin həqiqətən səhvi olub və məşqçiləri hirsləndiriblər. Amma bu, onlara 11 yaşlı uşaqlara pis örnək olmağa əsas verirmi? Təhqirlərlə “nümunəvi” davranış sərgiləyən bu adamlar azyaşlıların təlim-tərbiyəsi ilə belə məşğul olur? Onlar hansı haqqla komandanı meydandan çıxarır, uşaqların oyununu korlayır?
Yəqin ki, klub rəhbərliyi bu məşqçilərdən nəticə istədiyi üçün belə mənzərə yaranıb. Əks halda, hansısa hakim səhvinə görə bu addım atılmazdı. Klubun da, AFFA-nın da yiyəsi SOCAR-dı – buyurub aydınlaşdırsınlar: onlara uşaq futbolunun inkişafı lazımdı, yoxsa yalançı qələbələr?
U-11 Liqasının “Azəri” TİM – “Qoşqar-UGİM-2” matçında da qonaqlar iştirak etməyib. Daha doğrusu, onlar oyuna çıxarmaq üçün kifayət edən sayda uşaq tapa bilməyib. Hələ 2-ci turdu və bu mənzərə biabırçı deyilmi?
Uşaq futbolu bu cür idarə olunan məmləkətdə biz yeni nəslin niyə üzə çıxmadığını, millilərimizin nəyə görə məğlubiyyətləri sıraladığını, əsas yığmamığın Maltanı, Kosovonu uda bilmədiyini düşünürük. Sizcə, bizi daha faciəli sabah gözləmirmi? Marketoloqların fırlatdığı futbol təsərrüfatı necə olmalıydı ki?
FƏRİD