Misli Premyer Liqasının 33-cü turunda baş tutan Azərbaycan derbisində növbəti dəfə böyük hesab qeydə alınıb.
Futbolinfo.az saytının məlumatına görə, əzəli rəqiblər “Qarabağ”la “Neftçi” arasında ölkə çempionatları tarixində 10-cu dəfə azarkeşlər darmadağın izləyiblər.
Texniki nəticələri nəzərə almasaq, geridə qalan 95 qarşılaşmanın 10-da tərəflərdən biri 3 və ya daha böyük hesabla qələbə qazanıb. Bunun isə 9-u “Qarabağ”ın aktivindədir. “Neftçi” ölkə çempionatları tarixində cəmi bir dəfə Azərbaycan derbisində darmadağına sevinib. Bu, düz 24 il əvvələ – 2000-ci ilə təsadüf edib.
“Qarabağ”ın ondan sonrakı darmadağınlarında isə həm 3, həm 4, həm 5, həm də 6 qol fərqli nəticə yaşanıb. Hesabat turunda komandalar arasında ilk dəfə 5 top fərqli hesab baş verib. Rekord isə “Qarabağ”ın 6:0 hesabı ilə qalib gəldiyi matçdır.
Azərbaycan Kubokunun yarımfinalındakı duelləri də nəzərə alsaq, “Qarabağ” 2024-cü ildə “Neftçi” ilə üz-üzə gəldiyi 4 qarşılaşmanın hamısında böyükhesablı qalibiyyət əldə edib.
Azərbaycan çempionatlarındakı böyük hesablar:
04.11.2000. “Qarabağ” – “Neftçi” 0:4
13.05.2011. “Qarabağ” – “Neftçi” 3:0
28.02.2014. “Neftçi” – “Qarabağ” 1:4
21.08.2016. “Qarabağ” – “Neftçi” 3:0
08.11.2020. “Neftçi” – “Qarabağ” 0:6
30.10.2021. “Qarabağ” – “Neftçi” 4:0
21.05.2022. “Qarabağ” – “Neftçi” 4:1
02.12.2022. “Neftçi” – “Qarabağ” 0:4
03.03.2024. “Neftçi” – “Qarabağ” 1:4
04.05.2024. “Qarabağ” – “Neftçi” 5:0