Parisdə keçirilən Olimpiya Oyunlarında kişilər arasında tennis turnirinin püşkatma mərasimi keçirilib. “Böyük Dəbilqə”nin 24 qat çempionu serb tennisçi, dünyanın ikinci raketkası Novak Cokoviç ilk mərhələdə avstraliyalı Metyu Ebdenlə, ikiqat olimpiya çempionu ispaniyalı Rafael Nadal isə macar Marton Fuçsoviçlə qarşılaşacaq.
Cokoviç və Nadal olimpiya turnirinin ilk mərhələsindəki görüşlərində qalib gəldikləri halda, ikinci mərhələdə bir-biri ilə qarşılaşacaqlar.
2024-cü il Olimpiadasında tennis turniri iyulun 27-dən avqustun 4-dək keçiriləcək. İştirakçılar beş kateqoriya üzrə medal dəstləri uğrunda mübarizə aparacaqlar: qadınların tək və cüt, kişilər arasında tək və cüt, qarışıq cütlər.