“Ümumi götürsək baş məşqçimizin işindən narazı deyilik. Lakin klub rəhbərliyi olaraq komandada məşqçi dəyişkliyini nəzərdən keçiririk”. Bu sözləri futbolinfo.az saytına açıqlamasında II Liqa təmsilçisi “Şəfa”nın idman direktoru Elvin Ələsgərov deyib.
Elvin bəy qış fasiləsində heyətə yeni futbolçular cəlb etmək niyyətində olduqlarını bildirib: “Komandamız mövsümü ümumilikdə yaxşı keçirir. Təkcə “Şahdağ Qusar”a 1:7 hesablı məğlubiyyətimiz bu mənzərəyə kölgə salır. Həmin oyuna futbolçularımız ümidverici başladı, lakin sonrası haqqında danışmaq istəmirəm. O qarşılaşmada əldə olunan nəticənin məsuliyyəti hər birimizin üzərinə düşür. Qış fasiləsindən sonra hücum, yarımmüdafiə və müdafiə xəttinə yeni oyunçular cəlb etməyi planlaşdırırıq. Bundan əlavə, klubun infrastrukturunun və ümumi şəraitinin gücləndirilməsi üçün müəyyən addımlar atırıq. Hər şey sürətli olmasa da, planlı şəkildə irəliləyirik”.
Xatırladaq ki, “Şəfa” hazırda turnir cədvəlinin 2-c pilləsindədir. Liderdən 5 xal geri qalan komandanın baş məşqçi Nadir Əliyevlə vidalaşacağı deyilir.
GÜNAY SÜLEYMANOVA