“Peşən üzrə daha da yaxşı olmaq üçün daim öz üzərində çalışıb öyrənməlisən. Mən də bundan çəkinmirəm. Futbolda hər zaman inkişaf etmək və daha yaxşısını öyrənmək mümkündür. İnanıram ki, bunun öhdəsindən gələ biləcəyəm”. Bu sözləri futbolinfo.az saytına açıqlamasında “Sumqayıt”ın baş məşqçisi Vaqif Cavadov deyib.
35 yaşlı mütəxəssis “gənclik şəhəri” təmsilçisi ilə 2,5 illik yeni müqavilə bağlaması barədə fikirlərini də bölüşüb: “Rəhbərliyə təşəkkürümü bildirirəm ki, ilk gündən mənə güvəndilər və müvəqqəti olaraq baş məşqçi postuna təyin etdilər. Bu, mənim üçün çox dəyərli təcrübə oldu. İşimiz hər iki tərəfi qane etdi, fikirlərimiz üst-üstə düşdü və nəticədə müqavilə bağladıq. Qarşıdakı 2,5 illik müddətdə daim ən yaxşısını etməyə çalışacağıq. Komandanı üst pillələrdə qərarlaşdırmaq və inkişaf etdirmək üçün əlimdən gələni edəcəyəm. Hər oyuna 3 xal qazanmaq məqsədilə çıxacağıq. Komanda üçün düşündüyüm hədəflər çox böyükdür və buna çatmaq üçün hər bir detalı diqqətlə nəzərdən keçirəcəyik. Mövsümün sonunda daha yaxşı pillələrdə qərarlaşacağımıza inanıram. Hədəflərimizi yavaş-yavaş da olsa, gerçəkləşdirəcəyik”.
Cavadov “Sumqayıt”ın hazırkı heyəti haqqında da fikirlərini bölüşüb: “Sumqayıt”ın hazırkı heyəti məni tam qane edir. Əgər komanda ilə bağlı fikirlərim müsbət olmasaydı, bu vəzifəni qəbul etməzdim. Hər bir futbolçunun durumundan razıyam. Amma təbii ki, gələcəkdə komandaya yeni futbolçular da cəlb olunacaq. Hər bir futbolçunun potensialı və komanda ilə olan ahəngi bizim üçün vacibdir. Balansı tapmaq üçün çalışacağıq. Düzgün işləsək, hər şey qaydasında olacaq”.
Baş məşqçi gənc futbolçulara xüsusi önəm verəcəklərini də vurğulayıb: “Qış fasiləsində əsas məqsədimiz komandanı mövsümün ikinci yarısına maksimum dərəcədə yaxşı hazırlamaqdır. Hazırlıq mərhələsində həm fiziki, həm də taktiki baxımdan işlər görəcəyik. Gənc futbolçularımıza daim güvənəcəyik və onlara üstünlük verəcəyik. Onların inkişafı təkcə “Sumqayıt” üçün deyil, həm də Azərbaycan futbolu üçün önəmlidir. “Sumqayıt”ı daha güclü mövqeyə gətirmək üçün burada hər bir şərait mövcuddur. Sadəcə, buna vaxt və maliyyə lazımdır. İnanıram ki, bütün bunlar təmin olunacaq və biz də öz işimizi layiqincə görəcəyik”.
Cavadov transfer siyasətinə də toxunub: “Mövcud heyət baxımından mövqelərimizdə ciddi problem yoxdur. Lakin müəyyən mövqelər üçün yeni oyunçulara ehtiyacımız var. Düzgün transferlər edərək komandamızı daha da gücləndirməyi planlaşdırırıq. Mövcud oyunçularımızla birlikdə güclənib, sezonu başa vuracağıq. İnanıram ki, düzgün qurulmuş strategiya ilə həm azarkeşləri sevindirəcək, həm də “Sumqayıt”ı daha yüksək səviyyəyə çatdıracağıq”.
GÜNAY SÜLEYMANOVA