“Oyuna yaxşı başlamışdıq. İlk hissədə sürətimiz aşağı olsa da, ikinci hissədə tempi artıraraq qol vurduq. Qol vurmaq üçün başqa imkanlarımız da oldu, amma təəssüf ki, yararlana bilmədik. Qalib gəlsəydik, turnir cədvəlindəki yerimizi daha da möhkəmləndirərdik. Amma çox təəssüf ki, alınmadı”. Bu sözləri futbolinfo.az saytına açıqlamasında “Neftçi” – “Sabah” (1:1) qarşılaşmasından sonra Yusif İmanov deyib.
Gənc qolkiper həmçinin komandanın əsas məqsədinin hər oyunda qələbə olduğunu vurğulayıb: “Hər oyun meydana yalnız qələbə üçün çıxırıq. Başqa ehtimalı heç düşünmürük. “Neftçi” ilə matçda iki xal itirsək də, sonrakı oyunlarda uğur qazanaraq mövqeyimizi möhkəmləndirmək niyyətindəyik. Bu matçı analiz edərək, səhvlərimizi aradan qaldırmağa çalışacağıq. Xüsusilə son nöqtədə daha dəqiq olmalıyıq. Çünki bu cür oyunlarda itirilən xallar gələcək üçün çətinlik yarada bilər”.
22 yaşlı əlcək sahibi növbəti turda “Sumqayıt”la baş tutacaq ev oyununa da toxunub və 3 xal uğrunda sonuna qədər mübarizə aparacaqlarını deyib: “Gələn tur evdə “Sumqayıt”la qarşılaşacağıq. Bu matç bizim üçün çox önəmlidir. Azarkeşlərimizin qarşısında oynamaq hər zaman motivasiyamızı artırır. Sonuna qədər mübarizə apararaq, 3 xal qazanmaq istəyirik. Çempionatda hər bir xalın dəyəri var və biz də bunun fərqindəyik”.
GÜNAY SÜLEYMANOVA