“İdman” TV-də I Liqaya həsr olunan yeni verilişin efirə çıxması barədə xəbər vermişdik.
Futbolinfo.az verilişin layihə rəhbəri Rəşad Rafiqoğludan bu barədə ətraflı məlumat öyrənməyə çalışıb. Həmkarımız hədəflərindən, planlarından danışıb.
Rəşad bəy verlişin mütəmadi olaraq həftədə bir dəfə yayımlanacağını bildirib: “Hər turun matçlarından qollar və maraqlı məqamlar tamaşaçılara görüntülərlə təqdim ediləcək. Bölgələrdə keçirilən vacib oyunlara müxbirlərin ezam olunması, çəkilişlərin aparılması və futbolçularla yanaşı məşqçilərdən müsahibələrin hazırlanması, geniş reportajların yayımlanması planlaşdırılır”.
Veriliş yalnız bundan ibarət olmayacaq: “Verilişin qonaqları seçilərkən əsasən futbol mütəxəssisləri, eyni zamanda I Liqada çıxış edən komandaların məşqçiləri, futbolçuları və rəhbərlik layihəyə dəvət ediləcək. Lazım gəldikdə jurnalistlərin iştirakı da nəzərdə tutulub. İlk buraxılışdan sonra layihə futbolsevərlər tərəfindən müsbət qarşılanıb. Xüsusilə bölgə komandalarının azarkeşlərinin sosial şəbəkələrdəki reaksiyaları verilişə böyük maraq göstərildiyini təsdiqləyib”.
Bəs, I Liqanın oyunlarının kanal vasitəsi ilə yayımlanması mümkündürmü? Rafiqoğlu bu barədə də danışıb: “Hazırda “İdman” TV-nin I Liqanın yayım hüququnu alıb-almaması ilə bağlı rəsmi məlumat yoxdur. Lakin yeni layihənin məqsədi I Liqaya diqqətin artırılması və futbol ictimaiyyətində tanınmasının artırılmasıdır”.
GÜNAY SÜLEYMANOVA