“Atalanta” İtaliya A Seriyasının 19-cu turunda səfərdə “Sassuolo”nu 6:2 hesabıyla məğlub edib.
Futbolinfo.az xəbər verir ki, sözügedən qarşılaşmada bir qolun müəllifi olan “Atalanta”nın forvardı Duvan Sapata dekabr ayında vurduğu qolların sayını 9-a çatdırıb.
Sapata A Seriyasında çıxdığı son 6 qarşılaşmada da fərqlənməyi bacarıb. Dekabr ayında iştirak etdiyi 6 oyunda 9 qol vuran forvard, A Seriyası tarixində yeni rekorda imza atıb. Belə ki, 27 yaşlı hücumçu A Seriyasında bir ayda ən çox qol vuran 4-cü futbolçu olub. Buna qədər liqa tarixində bir ayda ən çox qol vuran oyunçu “Milan”lı Qunnaro Nordalyu olub. O, 1950-ci ilin fevral ayında 10 qol vurmağı bacarmışdı.
Sapatayla birlikdə Cüzeppe Meatsa (1938), Antonio Ancellilo (1958) və Serco Briqenti (1961) bir ayda 9 qol vurmağı bacaran futbolçulardır.