İştirak ərizələrinə diqqət salarkən mövsümün ən gənc qolçusu Ədilxan Qarəhmədovu siyahıda görmədik. “Səbail” onu ikinci komandasının heyətində sifariş edib, biz isə ümumi siyahıya əlavə etdik. Amma bəzi gözdənqaçmalar, kiminsə statistikada nəzərə alınmaması ola bilər. Hətta istisnaları nəzərə alanda da təqdim etdiyimiz statistikada ciddi dəyişiklik mümkünsüzdü.
Klublar Komitəsi iclasları zamanı bu məqamlara diqqət yetirməli, müzakirəyə onuncu dərəcəli məsələləri yox, ölkə futbolunun sabahı baxımdan gərəkli problemləri çıxarmalıdı. Elə İcraiyyə Komitəsi də yalnız təyinat təsdiqləməklə, veteranlara təqaüd ayırmaqla kifayətlənməməlidi. Klubların transfer siyasəti nəzarətə götürülməli, onlara təsir göstərilməlidi.
Vaxtilə yaş limiti tətbiq olunarkən İK çox tənqid olunmuşdu. Lakin məhz bu qərar üzündən indi orta yaş həddi nisbətən abırlıdı. Təsəvvür edin, 23 yaşınadək futbolçuların start heyətdə oynaması məcburiyyəti olmasaydı, hansı mənzərə ilə qarşılaşardıq. Bu baxımdan gənclər millimizin baş məşqçisi Milan Obradoviçin Klublar Komitəsinin iclasında verdiyi təklifi alqışlamaq istəyirsən. Serb mütəxəssis klubların start heyətdə 1 yox, 2 gənci oynatmasını istəyib.
Təbii ki, bu təklifin özü də tam “bişməyib”. Onu reallaşdırmaq üçün material olmalıdı. Görək bizdə klublar buna hazırdımı? Ümumiyyətlə, ölkədə kifayət qədər gənc varmı? Yox, vəziyyət faciəvidi! Ona görə də belə qərarın qəbulu çempionatın səviyyəsini bir qədər də aşağı salacaq, oyun keyfiyyətinə ciddi təsir göstərəcək. Hazırda klublarımız yaş limitinə görə çox əziyyət çəkirlər. Çünki layiqli nəsil yetişməyib, məcburiyyətdən heyətə qoyulanlar ümumi ansamblı pozur.
Bu statistikayla tanış olduqdan sonra AFFA-nın baş katibi Elxan Məmmədovun israrını da alqışlamaq istəyirsən. O, UEFA-nın klublara ayırdığı yarım milyon avronun hesabatını istəyir. Həmin vəsait məhz uşaq futbolu üçün ayrılıb, əksər klublar isə qışda onu transferlərə dağıdıb, qoca əcnəbiləri heyətə qatıb. Halbuki bu pullar uşaq futbolun sərf olunmalı, sağlam, rəqabətədavamlı nəsil yetişməlidi.
Bununla belə, baş katibin indi ayılması da təəssüf doğurur. Bəs, ötən 10-12 ildə niyə bu sahəyə həssas yanaşılmayıb? Su boğaza çatanda fəryad qoparmaq lazım deyil, əvvəldən strategiya düzgün seçilməliydi. İndi davası aparılan 1 milyon manatın 40-50 qatı indiki AFFA rəhbərliyinin vaxtında uşaq futbolu adı ilə xərclənib, nəticə isə odur ki, Premyer Liqada orta yaş həddi 27-yə yaxındı.
AFFA ziyanın yarısından geri qayıtmaq istəyirsə, daha tələbkar olmalıdı. Obradoviçin təklifi öz yerində, bizim də variantımız var. “Futbolinfo” olaraq başqa limitin tətbiqini təklif edirik. Belə ki, yeni mövsümdən klubların qarşısına start heyətdə azı 3 yetirməsinin oynadılması tələbi qoyulsun. 23 yaşa çatmamış futbolçu da məhz klubun öz yetirməsi olsun. Yalnız bu yolla klubları uşaq futboluna diqqət göstərməyə məcbur etmək olar. O zaman onlar say düzəltmək naminə işləməyəcəklər, heyətin güclü olması üçün ən istedadlıları seçəcək, diqqət edəcək, ən yaxşı səviyyədə hazırlamağa səy göstərəcəklər. Hər klubun 5-6 futbolçunu üzə çıxarması isə milliyə 40-50 layiqli namizədin yetişməsi demək olacaq.
İndiki durum bizi uçuruma aparır. Yığma komandaların heyətindəki milliləşənlərin səviyyəsi bəlli, veteran futbolçular da yavaş-yavaş sıradan çıxır. Bir neçə ildən sonra millidə kim oynayacaq? İndiki AFFA rəhbərliyinin vaxtında yetişənlərdən yalnız Mahir Mədətovun start heyətinə düşə bildiyini nəzərə alsaq, qaranlıq sabahı özünüz düşünün.
CAVAD