Bu gün Topaz Premyer Liqasında 28-ci tura yekun vurulacaq. Futbolinfo.az xəbər verir ki, turun son oyun günündə iki qarşılaşma baş tutacaq.
Öncə İnter paytaxt derbisində Rəvanla üz-üzə gələcək. "İnter" indiyədək "Rəvan"a qarşı keçirdiyi 7 oyunun hamısında qalib gəlib. Onlar son 5 qarşılaşmada 2 və ya daha çox qol vurmağı bacarıb. Top fərqi də "bankirlər"in xeyrinədi – 17:5. Cari mövsümə təsadüf edən 3 görüşdə isə hər iki komanda qol vurub. Bu qarşılaşmalarda "İnter" müvafiq olaraq 5:1, 3:2 və 2:1 hesabıyla qalib gəlib. Kaxaber Sxadadzenin komandasının son turlardakı inamlı çıxışını nəzərə alsaq, meydan sahiblərinin "aslanlar"a yenə xal verməyəcəyini gözləmək olar.
Turun qapanış matçında lider Qarabağ Qəbələ ilə üz-üzə gələcək. Ardıcıl 5 oyunda rəqibinə xal verməyən Qarabağ 17 aydı bu komandaya uduzmur. Ağdam təmsilçisi öz meydanındakı son iki oyunda minimal fərqlə qalib gəlib. Bütövlükdə, "Qarabağ"ın 11, "Qəbələ"nin 5 qələbəsi var. 7 qarşılaşmada sülh qeydə alınıb. Ağdamlıların vurduğu 30 qol qarşılığında "Qəbələ" 21 dəfə fərqlənib. Cari mövsüm baş tutan oyunlarda Qurban Qurbanovun yetirmələri səfərdəki hər iki görüşü 1:0 hesablı qələbəylə başa vurub. Bakıdakı matçda isə bu komanda 4:3 hesabıyla üstün olmuşdu. Bu səbəbdən həm "Qarabağ"ın çempionluq, həm də "Qəbələ"nin "üçlük" arzusunu nəzərə alsaq, maraqlı oyunun şahidi olacağımızı demək olar.
Topaz Premyer Liqası
28-ci tur
30 mart
17:00. İnter – Rəvan
Hakimlər: Elvin Əsgərov, Munis Abdullayev, Nahid Əliyev, Tahir Əhmədov.
Əlavə köməkçi hakimlər: Vüsal Əliyev, Alik Yunusov.
AFFA nümayəndəsi: Telman Əzizov.
Hakim-inspektor: Rövşən Əhmədov.
Bakı. “Şəfa” stadionu.
18:00. Qarabağ – Qəbələ
Hakimlər: Rəhim Həsənov, Namiq Hüseynov, Akif Əmirəli, Teymur Fərhadov.
Əlavə köməkçi hakimlər: Əliyar Ağayev, Ramil Əhmədov.
AFFA nümayəndəsi: Mübariz Hüseynov.
Hakim-inspektor: Xaqani Məmmədov.
Bakı. Tofiq Bəhramov adına Respublika stadionu.
Turun digər oyunları: Sumqayıt – AZAL – 2:1, Bakı – Simurq – 2:1, Neftçi – Xəzər Lənkəran – 1:0.
| 1 | Qarabağ | 27 | 17 | 7 | 3 | 50 | 14 | +36 | 58 |
| 2 | Neftçi | 28 | 15 | 6 | 7 | 41 | 33 | +8 | 51 |
| 3 | Bakı | 28 | 14 | 6 | 8 | 45 | 30 | +15 | 48 |
| 4 | İnter | 27 | 13 | 6 | 8 | 41 | 31 | +10 | 45 |
| 5 | Qəbələ | 27 | 13 | 5 | 9 | 37 | 28 | +9 | 44 |
| 6 | Simurq | 28 | 10 | 9 | 9 | 31 | 22 | +9 | 39 |
| 7 | XL | 28 | 8 | 10 | 10 | 28 | 39 | –11 | 34 |
| 8 | AZAL | 28 | 6 | 8 | 14 | 27 | 42 | –15 | 26 |
| 9 | Rəvan | 27 | 3 | 8 | 16 | 15 | 46 | –31 | 17 |
| 10 | Sumqayıt | 28 | 3 | 7 | 18 | 18 | 48 | –30 | 16 |
Bombardirlər:
15 – Reynaldo (Qarabağ)
12 – Vaqif Cavadov (İnter)
11 – Daniel Subotiç (Qəbələ)
9 – Draqan Çeran (Simurq)
8 – Etame Mbilla (Xəzər Lənkəran), Rauf Əliyev (Bakı).