"Qarabağ"ın müdafiəçisi Maksim Medvedev Topaz Premyer Liqasının 28-ci turu çərçivəsində qarşılaşdıqları "Qəbələ" ilə oyunu şərh edib. Futbolinfo.az saytına açıqlamasında o, 3:0 hesabıyla qalib gəldikləri görüşü belə şərh edib:
"Çox maraqlı oyun oldu. Belə havada oynamaq çətindi. Biz çoxdandı ki, belə meydanda futbol oynamamışdıq. Fikrləşdiyimizdən daha ağır oldu. “Qəbələ” bizi kubokdan kənarda qoymuşdu. İstəyirdik ki, daha güclü olduğumuzu sübut edək. Birinci hissədə bərabər oyun getdi. Demək olar ki, nə rəqibin, nə də bizim qol şanslarımız oldu. Amma ikinci hissədə hücuma daha çox atıldıq. Bəzi problemlər oldu. Ötürmələrdə səhvlərə yol verirdik. Bu, meydanın durumu ilə əlaqədar idi. Amma sonda qələbə qazandıq. Əsas 3 xaldı".