“Komanda sayı artdıqca hər şey daha yaxşı olacaq”

19 yaşadək futbolçulardan ibarət Azərbaycan millisinin baş məşqçisi Aqil Nəbiyevin futbolinfo.az saytına müsahibəsi

– Martın 20-dən təlim-məşq toplanışındasınız və bu gün Şimali Makedoniya ilə yoxlama görüşü keçirəcəksiniz. Komandada ümumi vəziyyət necədir?

– Şimali Makedoniya ilə oyun hazırlıq xarakterli matçdır. Uşaqları noyabra qədər tam hazır vəziyyətə gətirməyə çalışırıq. Üç futbolçu ilk dəfədir milliyə dəvət alıb. Həm onları meydanda görmək istəyirik, həm də fərqli sistemlə meydana çıxacağıq. Noyabra qədər bəzi sistemləri sınaqdan keçirməyi planlaşdırırıq. Ümumilikdə hər şey normaldır.

– U-19-dakı oyunçular yaxın illərdə peşəkar futbolda ilk addımlarını atacaqlar. Onları buna hazır saymaq olar?

– Bilirsiniz ki, futbolçular maksimum bir həftə və ya 8 gün yığmada bir arada olurlar. Onda da iki oyun keçiririk, bir günü də bərpaya gedir. Məşq üçün də 4-5 gün vaxt olur. Bu müddətdə fiziki baxımdan uşaqları inkişaf etdirə bilmərik. Onlar toplanışlara klublarından hazır vəziyyətdə gəlməlidirlər. Texniki bacarıqlar və fiziki durumlar klublarda hazırlanır. Təkcə Azərbaycanda deyil, böyük futbol ölkələrində də futbolçular klublardan yığmalarına hazır vəziyyətdə gedirlər. Millinin məşqçiləri kimi, sırf taktika üzərində çalışırıq. Gələcək vəd edən futbolçular çoxdur. Ümumi vəziyyətləri də yaxşıdır. İnanıram ki, bu uşaqların bir neçəsi gələcəkdə əsas milliyə qədər yüksələcəklər.

– Oyunçular klublardan hazır vəziyyətdə gəlirlər?

– Durumları normaldır. Getdikcə hər şey daha yaxşı olacaq. Biz də onların daha yüksək liqalarda oynamalarını istəyirik. Çünki çoxu U-19 liqasından gəlir. Avropada 19 yaşlı futbolçu artıq əsas milliyə dəvət alır, top-klublarda çıxış edir. Bizim yaralı yerimiz odur ki, uşaqların 90 faizdən çoxu U-19 liqasından gəlir. Barmaqla sayılacaq qədər oyunçu Birinci Divizionda və əsas komandada olur.

– Qeyd etdiniz ki, Avropada 19 yaşlı futbolçu əsas millidə, böyük klublarda çıxış edirlər. Azərbaycanda niyə belə deyil? Klublar gənclərə güvənmirlər?

– Klubların daxili işinə qarışa bilmərik. Premyer Liqada komanda sayı yavaş-yavaş artır. Həmçinin növbəti mövsümdən Birinci Divizionla əvəzedicilərin çempionatı ayrı keçiriləcək. İnanıram ki, gələn il vəziyyət daha yaxşı olacaq. Müəyyən qədər sıxıntı var. Perspektivli uşaqlarımız az deyil. Sadəcə, Premyer Liqanın bəzi klubları liqada qalmaq, bəziləri avrokuboklara vəsiqə qazanmaq uğrunda mübarizə aparırlar. Onlar da risk edib həmin cavanlardan istifadə edə bilmirlər.

– Gələn mövsümdən Birinci Divizionla əvəzedicilərin çempionatı ayrı olacaq. Bunun aşağı yaş qrupu üzrə millilər üçün nə kimi xeyir var?

– Belədə hər iki çempionatda komanda sayı artacaq. Ümumiyyətlə, bu turnirlərin ayrılmağı daha məqsədəuyğundur. Əvəzedicilər əsas komandaların ehtiyat qüvvələridir. Həm U-17-dən ora kimisə cəlb edə, həm də əsas komandada formada olmayanları oynada bilirsən. Bunu təqdirəlayiq addım sayıram.

– Vaxtilə gənc oyunçulardan ibarət komanda formalaşdırıb yüksək liqaya buraxardılar. Belə bir sistem yaratmaq variantına necə baxırsınız?

– Klubun strategiyasından da asılı olur. Məsələn, klub rəhbəri həmin komandadan gərək nəticə tələb etməsin, gənclərin inkişafına şərait yaratmalıdır. Belə bir klubun yaradılması daha yaxşı olar.

– U-19-dakı futbolçular qısa müddət sonra Premyer Liqada çıxış edəcəklər, əsas millidə yer alacaqlar. Onların durumuna əsasən, futbolumuzun gələcəyi necə görünür?

– Komanda sayı artdıqca hər şey daha yaxşı olacaq. Sadəcə, düzgün strategiya qurmaq lazımdır. Bizim toplanışlarımız maksimum 7-8 gün çəkir. Bu müddətdə uşaqlara çox şey öyrədə bilmirik. Millinin məşqçiləri olaraq düzgün seleksiya işləri aparmalıyıq ki, komandaya hazır oyunçular cəlb olunsun. Ümid edirəm ki, növbəti seçmə mərhələdə daha yaxşı nəticələr olacaq. Xüsusən də komanda sayının artması inamlı danışmağa imkan verir. Çünki belədə seçim daha çox olur.

– Həm aşağı yaş qruplarında, həm də əsas yığmada milliləşdirilmiş futbolçular heç də az olmur. Siz buna necə baxırsınız?

– Bizim komandamızda milliləşdirilmiş oyunçu yoxdur. Kənarda yaşayan azərbaycanlılar var ki, onları cəlb edirik. Təbii ki, aşağı yaş qruplarında özümüzünkülərin olması daha yaxşıdır. Bəzən əsas millidə bu hal olur. Bu, təkcə Azərbaycan millisində olmur, Avropanın bütün yığmalarında rast gələ bilərsən. Avropada başqa millətin nümayəndələrinin milliləşdirilməsi təcrübəsi çox sınaqdan keçirilib.

– Əsas millidən söz düşmüşkən, Canni De Byazinin komandası AVRO-2024-ün seçmə mərhələsində bu gün Avstriyanın, üç gün sonra isə İsveçin qonağı olacaq. Nə gözləyirsiniz?

– Millimiz ardıcıl 5 oyunda qələbə qazanıb. Komandada özünəinam artıb. Bu mənada çətin səfərlərdən sərfəli nəticə ilə dönmək olar. Artıq qələbə qazanmağı bacarırıq, futbolçularda özünəinam var.

– Ardıcıl qələbələrə görə rəqiblər millimizə əvvəlki kimi barmaqarası yanaşmır, ciddi hazırlaşır. Bu, yığmamızın işini daha da çətinləşdirməz?

– Hansısa millinin istənilən rəqibinə barmaqarası yanaşmasına inanmıram. Rəqiblərin komandamıza ciddi yanaşması sevindirici haldır. Deməli, bizi təhlükəli komanda kimi qəbul edirlər. Milli hamımızın komandasıdır, hər kəs dəstək verməlidir.

– Hazırkı duruma əsasən, Avstriya və İsveçlə görüşdə hansı nəticəyə ümid etmək olar?

– Ümid edirəm ki, komandamız ən azı məğlub olmayacaq.

ABBAS

Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.

Sahə: Uşaq və gənclərin fiziki və mənəvi inkişafında idmanın rolu