Mert Çelik yanlış qərar vermək istəmir: “Mövsüm başa çatandan sonra bəlli olacaq”

“Neftçi”nin üzvü Mert Çelik uzun fasilədən sonra start heyətində göründü. Tovuzda sonradan meydana daxil olan futbolçu “Şamaxı” ilə görüşdə ilk dəqiqələrdən meydanda idi. Autsayderlə ev qarşılaşmasının nəticəsi (1:1) komandası üçün yaxşı olmasa da, mərkəz müdafiəçisi pis oynamadıqlarını düşünür. O, bu barədə futbolinfo.az saytına müsahibəsində deyib.

– Düşünürəm ki, normal oynadıq. Baxmayaraq ki, nəticə istədiyimiz kimi olmadı.

– Uzun müddət sonra meydana çıxdın. Özünü necə hiss etdin?

– Özümü çox yaxşı hiss etdim. Uzun zamandır oynamırdım, amma hər zaman özümü hazır tutmağa çalışıram.

– Son matçlardakı uğursuzluqlar azarkeşləri narazı salıb…

– Bu çətin durumdan çıxacaq olan bizlərik. Azarkeşlər haqlı olaraq hər zaman qələbə istəyir. Mən komandama güvənirəm. Son 2 oyunda qalibiyyət əldə edib ölkə kubokunun finalına daha yüksək əhval-ruhiyyədə çıxacağıq.

– Qalan matçlarda daha çox meydana çıxacağına inanırsan?

– Mənə nə qədər vaxt verilsə, əlimdən gələnin ən yaxşısını etməyə çalışıram. Yenidən daha çox oynayacağıma inanıram.

– Mövsüm sona yaxınlaşır və icarə əsasında “Neftçi”dəsən. Yenidən Azərbaycanda oynamaq istəyirsən?

– Hazırkı durumda bir şey deyə bilməyəcəm. Çünki bunun üçün çox erkəndir. Qarşıda kubokun finalı var və mən də həlledici qarşılaşma barədə düşünürəm.

– Səncə, kuboku qazana biləcəksiz?

– “Neftçi”də 3-cü mövsümümdür. Burada 2-ci dəfə titulu əldə etmək istəyirəm. Mövsüm başa çatanda ən doğru qərarı vermək niyyətindəyəm. Önümüzdəki mövsüm üçün yanlış qərar vermək istəmirəm.

– Başqa təkliflər var?

– Müqavilə ilə məxsus olduğum “Başakşəhər”lə görüşməliyəm. Təkliflər gəldiyini bilirəm, amma bununla menecerim maraqlanır.

FƏRİD