MOİK rəhbərliyi yaddan çıxmasın!

Yenə ömürlük cəza, yenə Divizion klubu. Və növbəti dəfə nəticələrin manipulyasiyası.

2017-ci ilin dekabrında Mirhüseyn Seyidovla Nizami Hacıyevin ömürlük diskvalifikasiyası ilə başlayan proses sonrakı illərdə davam etdi, onlarla şəxs cəzalandırıldı, futbolla bağlı fəaliyyətlərinə qadağa qoyuldu. AFFA dövlət strukturları ilə birgə fəaliyyət nəticəsində danışılmış oyunların kökünü tam kəsə bilməsə də, ciddi şəkildə azaldılmasına nail oldu. Ciddi nəzarət sayəsində zərərli ünsürlərin sayı yox olmaq səviyyəsinədək endirildi.

Bu işdə klublar da müəyyən işlər gördü. Son aylar bir neçə klubun öz oyunçusundan şübhələndiyini, AFFA-ya araşdırma üçün müraciət etdiyini eşitmişik. Təsadüfi deyil, bu gün cəzalandıran iki futbolçunun məşqçisi də onlardan birini şübhələndiyi üçün oyunun gedişində əvəzləyib.

Artıq xəbəriniz var ki, MOİK-in iki futbolçusu – Emin Mehtiyev və Fərmayıl Əliyev noyabrın 22-də baş tutan “Səbail”lə oyunun nəticəsini manipulyasiya etdikləri üçün bu gün ömürlük diskvalifikasiya edildilər. Günahkarlar Divizion klubunun təmsilçisi olsa da, sözügedən matç kubok qarşılaşması idi. Deməli, müvafiq qurumların səyi nəticəsində Divizionda işlər müəyyən qədər qaydasına salınıb, bu oyunlar mərc kontorlarından çıxarılıb, əvəzində Premyer Liqa təmsilçisi ilə görüşdə şans yaranan kimi fürsətcillər bundan yararlanmağa çalışıb.

MOİK-in “Səbail”ə uduzacağı zatən bəlli idi. Detallarını bilmirik, yəqin ki, səbəbkarlar ilk hissənin nəticəsinə və oyundakı qol sayına təsir ediblər ki, günahları sübut olunub.

MOİK-in futbolçuları Emin Mehtiyevlə Fərmayıl Əliyev bu mövsüm Azərbaycan Kubokunun 1/8 final mərhələsində “Səbail”ə qarşı keçirilmiş oyunun (0:4) nəticəsini manipulyasiya ediblər. UEFA-nın danışılmış oyunlarla bağlı Azərbaycan üzrə nümayəndəsi Seymur Səlimli “Report”a məsələ ilə bağlı araşdırmaların davam etdiyini bildirib: “Şübhələr çox ola bilər. Amma bu gün konkret olaraq 1 oyun ətrafında araşdırma aparılır. İstintaq hələ bitməyib. Hər şey mümkündür. Bilirsiniz ki, bu çox uzun və sonsuz mövzudur. İstintaq davam etdiyi üçün başqa adlar və klublar da çıxa bilər. Bununla bağlı heç bir zəmanət yoxdur. Həm daxildə, həm də xaricdə müraciət edə biləcəyimiz bütün tərəflərlə işləyirik. Hətta AFFA daxilindəki komissiya da bu işə köklənib”.

Mehtiyevlə Əliyev milli assosiasiyanın Apellyasiya Arbitraj Tribunalına apellyasiya şikayəti verəcəyini bildirib. Qərarla razılaşmayan təcrübəli oyunçular hələlik bu barədə danışmaq istəmədiyini deyib. Əvəzində həmin matçda MOİK-in baş məşqçisi olmuş Şəhriyar Məmmədov demək olar, faktı təsdiqləyib (Report): “Mehtiyevin “Səbail”lə oyun zamanı özbaşınalıq elədiyini qabarıq şəkildə görürdüm. Oyunun əvvəlində Eminin verdiyim tapşırıqları icra eləmədiyini gördüm. İlk 10 dəqiqə ərzində ona artıq iki dəfə bu barədə xəbərdarlıq elədim. Özbaşınalıq elədiyi üçün birinci hissədə əvəzlədim. Amma danışılmış oyunlarda iştirakı ağlıma belə gəlməzdi. Əvəzlədikdən sonra da kollektivin önündə 1-2 dəfə Eminə irad bildirdim. Cavabı belə oldu ki, rəqibdən qorxmadığımızı sübut eləmək istəyirdim. Peşəkar futbol oynamış biri kimi, yolverilməz səhvlərə əl atdı. Heç bir ağıllı futbolçu ikinci zonada pressinqə əl atmaz və komanda yoldaşlarını da buna təhrik eləməz. Eminin də nə eləmək istədiyini başa düşmürdüm”.

Məmmədov eyni cəzaya məruz qalan Əliyevlə bağlı fərqli fikirdədir: “Fərmayılın oyununda heç nə hiss eləməmişəm. Yalan danışmaq istəmirəm. Amma səhv eləmirəmsə, Fərmayıl Əliyev bunu bilib, gizli saxladığı üçün cəzalandırılıb”.

Cəza verilibsə, deməli, günah sübuta yetirilib. Məsələnin detalları zamanla üzə çıxacaq və o zaman daha çox bilgiyə malik olacağıq. Amma bütün bunlar bir reallığı dəyişmir: Divizionda səviyyə artmadıqca, maliyyə imkanları düzəlmədikcə stimulu olmayan futbolçular özləri üçün belə “stimul imkanları” yaradacaq. Səviyyəni qaldırmaq, paralel olaraq belə ünsürləri təmizləmək lazımdır.

Birinci Divizionda kifayət qədər gənc futbolçu oynayır. Mehtiyevlərin sayəsində onların gələcəyinin məhv olmasının qarşısı alınmalı, gənclər sağlam mübarizə ab-havasında yetişməlidirlər. Ən pisi, sözügedən oyunçuların MOİK-də – müzəffər Azərbaycan ordusunu təmsil edən klubda oynamalarıdır. Təkcə bu fakta görə həmin oyunçuları bağışlamaq olmaz. Üstəlik, bu klubun rəhbərliyi barədə də ciddi araşdırma aparılmalıdır.

CAVAD